Dýr orð Sigmundar Davíðs.

Dýr orð, eða hvað þetta sagði Sigmundur Davíð í gær: 

Sigmundur Davíð segir að með þessu sé hafin formleg vinna við það sem stefnir í að vera mestu úrbætur í þágu skuldsettra heimila nokkurs staðar í heiminum eftir að efnahagskrísan hófst árið 2007. Tillögurnar hafa verið nokkuð gagnrýndar af OECD og stjórnarandstöðunni. Gagnrýni þeirra síðarnefndu kemur Sigmundi Davíð ekki á óvart.

„Hvað hins vegar OECD varðar, og Alþjóðagjaldeyrissjóðinn og allar þessar stofnanir þá hef ég ekki miklar áhyggjur af því hvað hinum og þessum skammstöfunum finnst um þetta frumvarp og raunar kæmi það mér mjög á óvart að slíkar stofnanir væru opnar fyrir svona róttækum aðgerðum." 

Er þetta ekki oflæti eru menn ekki komnir framúr sjálfum sér ..... þarf að gera úrbætur hjá þeim sem ekki þarfnast þeirra og sækja ekki um slíka hjálp?????   Er ekki nær að hjálpa þeim sem þurfa raunverulega á henni að halda?    

Ég er einn af þeim sem hef vonað að Sigmundi og ríkisstjórn takist að hjálpa þeim sem eru í slæmum málum.  En ég ætlast ekki til mikilmennskubrjálæðis og ofsóknaræðis um leið.  Við þurfum ekki að slá heimsmet, við þurfum bara að vera lítillát og hógvær og hjálpa þeim sem þarfnast í þjóðfélagi jafnaðar og samhjálpar.   

Þannig er mín heimssýn..... 

Forseti: Þjóð í vanda

Sú þjóð er í vanda þegar hún hefur kosið yfir sig Forseta sem kann ekki mun á réttu og röngu. Munum þessi ummæli við Setningu Alþingis nú í sumar: 

Hann sagðist sannfærður um að þrátt fyrir vinsamlegar yfirlýsingar ýmissa forráðamanna Evrópusambandsins hefðu þeir ekki raunverulegan áhuga á að semja við Íslendinga. Hann vísaði til þess að Norðmenn hefðu tvívegis hafnað ESB-aðild í þjóðaratkvæðagreiðslu og sagði forsvarsmenn sambandsins ekki vilja eiga þriðju höfnunina yfir höfði sér.



Nú segir Forseti Íslands.



„Ég sagði í þingsetningarræðunni að það væri margt sem að benti til þess að og það væri mín ályktun eftir viðræður við marga og það hefur nú styrkst í þessari heimsókn að af ýmsum ástæðum sem að ég rakti í ræðu minni meðal annars þeirri að ekki væri unnt að ljúka viðræðum nema að ljóst væri að verulegur stuðningur væri meðal Íslendinga fyrir aðild. Því það er á vissan hátt óábyrgt af okkur sem þjóð að fara í alvöru, að fara í viðræður við alvörusamband eins og Evrópusambandið svona í einhverjum leikaraskap bara til þess að kanna nú hvað við kannski fengjum út úr því. Við verðum að passa okkar orðspor sem þjóð og sem lýðveldi að þegar við sækjum um inngöngu í aðildarsamband eins og Evrópu þá meinum við það í alvöru. Og það var það sem kanslarinn sagði í gær að ef að þjóðir meintu það ekki í alvöru þá ætti ekki að vera að eyða tímanum.“

Er þetta ekki að fara í kringum talað orð?  

Erum við ekki í vanda?  

Forsetinn: Fjölmiðlafulltúi ríkisstjórnarinnar

Öðruvísi mér áður brá.  Okkar ágæti forseti búinn að finna stað sinn.   Sem talsmaður og fjölmiðlafulltrúi ríkisstjórnarinnar.  Og hann er ekki sem verstur. Betri en margur atvinnumaðurinn!!!! En hvað þeir hugsa ráðamenn Þýzkaland það er annað mál.  Enda finnst Angelu þess ekki virði að mæta á blaðamannafundi með Forseta vorum.  Þeir skilja vafalaust ekki hugsunarhátt ríkisstjórnar okkar og fjölmiðlafulltrúans.   Sem getur ekki ákveðið úr því að það liggur svo skýrt fyrir að Íslendingar vilji aldrei ganga í ESB, að hætta þá bara þessum blessuðum umræðum í eitt skipti fyrir öll og draga umsóknina til baka.  En ákveður í staðinn að fresta viðræðum meðan Gunnar Bragi Sveinsson er utanríkisráðherra.  Sem er sérstaklega göfugt markmið.

Meðan stjórnin álítur að hún geti fengið allt í gegnum ESB samninga styrki og úthlutanir en láti ekkert í staðinn.  En oftast gengur lífið út á kaup kaups.  Mikið fæst ekki fyrir lítið. Og við getum kennt öðrum ýmislegt á okkar sviðum, fengið í staðinn ansi margt.  Þannig er lífið. 

LÍN: Ný stjórn á villigötum

Skrýtin byrjun nýrrar stjórnar LÍN,um breytingar á viðmiðunarreglum,  ekkert samstarf við heildarsamtök námsmanna.  Allt frekar fljóthugsað og einkennist af því sem hægri stjórnun hefur oft í för með sér, hugmyndin að einstaklingurinn eigi að standa sig að það séu hinir sterku sem eiga að bera mest úr bítum. Að námsmönnum sé engin vorkunn að ljúka 75% af annarnámi í staðinn fyrir 60.  Svo á að auka skriffinnsku með umsóknum um frávik frá reglunum.

Illugi Gunnarsson menntamálaráðherra sagði í gær að þeir sem eru í háskólanámi af fullri alvöru eigi að geta risið undir auknum kröfum  um námsárangur.(ruv.is)

   

Formaður Stúdentaráðs bendir á ýmsa galla í ákvörðun stjórnar sjóðsins. Fyrst er framkvæmt svo hugsað.  Fyrrverandi forstjóri FME byrjar ekki vel: 

María Rut Kristinsdóttir, formaður Stúdentaráðs Háskóla Íslands (SHÍ), segir afleiðingar þessara breytinga vera margþættar. „Það er enginn staðalstúdent sem hægt er að segja að þetta komi við á ákveðinn hátt. Fólk fer í gegnum háskólanám á mismunandi hraða og deildir háskólans eru mjög mismunandi,“ segir María Rut. „Staðreyndin er sú að um það bil fjórðungur allra áfanga við Háskóla íslands eru 10 eininga áfangar. Því eru miklar líkur á því að þessar breytingar á kröfum um námsframvindu hafi áhrif í fjölmörgum tilvikum,“ segir María Rut.

„Ef þessar breytingar verða samþykktar þá þýðir það að námsmaður sem fellur í einum 10 eininga áfanga á engan rétt til námslána. Þessi tala, 22 einingar, virðist líka mjög sérstök og úr lausu lofti gripin. Félagsstofnun Stúdenta, sem leigir út íbúðir til stúdenta, gerir kröfu um að námsmaður ljúki 20 einingum til að hann eigi rétt á að leigja stúdentaíbúð. Það er því ekkert samræmi í þessu,“ segir María Rut. (Mbl.is)

Og bendir á meginhlutverk sjóðsins að tryggja jafnræði til náms. 

María Rut Kristinsdóttir, formaður Stúdentaráðs Háskóla Íslands, telur ekki rétt að nota Lánastjóð íslenkra námsmanna til auka kröfur á námsmenn. Hlutverk sjóðsins sé fyrst og fremst að tryggja jafnræði til náms.

Um tíu prósent námsmanna við Háskóla Íslands taka ekki nógu margar einingar á önn til þess að fá námslán verði hugmyndir um ný viðmið Lánasjóðsins að veruleika. (ruv.is)

Þau eru skrýtin fyrstu verk nýs Menntamálaráðherra. Fyrst Ríkisútvarpið svo LÍN.   

Einmana reiðmaður við stjórnarráðið

Þetta er eitthvað svo sígilt.  Maður í vanda  vakir um nætur, byltir sér í rúminu og gruflar.  Ríður af stað um morguninn.  Tilgangurinn að hitta æðsta valdamann þjóðarinnar.  Auðvitað á hann að sitja í Stjórnarráðinu  og leysa hin erfiðu mál þjóðarinnar.  En forsætisráðherrann  er oft ekki í Stjórnarráðinu eflaust er Sigmundur að hitta forsætisráðherra Danmerkur og ræða við hann á dönsku eða var það enska sem hann notaði til að hrósa skeleggum forsrætisáðherra Dana, Var Sigmundur Davíð ekki í námi í Danmerkur samkvæmt Curiculum Vitae, talaði hann aldrei dönsku í Danmörku?  

 Maður ríður í hlað engin móttaka nema lögregla og valdsyfirvöld. Hann er brýnt erindi.
Karl sem á erfitt, atvinnulaus, er að missa allt, hús, hestahús, hesta, starfsemi.   Hann treysti á loforð Sigmundar og kappa Finns varnarkonungs.  En það er kerfið, allir kerfisþrælarnir sem eru á varðbergi og koma í veg fyrir gjörðir og framkvæmdir.  Það er ekki SDG að kenna.Það er ekki Finni að kenna.  Með í hendinni er hann með bréf, klippur handa ráðherra og fíflabana.  Því margt þarf að gera. Margt er hægt að gera.  Hann treystir sínum manni. En það eru ansi margir sem hafa rætt þetta sama áður eða skrifað valdsmönnum.   Hann er ekki sá fyrsti sem ber að dyrum.  Það gerðu margir hjá fyrri ríkisstjórn. Og ekkert var hægt að gera, kerfið sagði það allt.  Margir sneru baki við xS og xV.

En Sigmundur Davíð og Finnur stóðu þó upp og sögðu það er eitthvað hægt að gera.  Það voru margir sem kusu þá út á það.  Og nú verða þeir að vera heima þegar einmana reiðmaður birtist.   Og segja honum hvað þeir ætla að gera.  Ætli allir geti beðið endalaust? 

Kannski verða fleiri en einn reiðmaður á ferð næst, og svo ennþá fleiri.  Það kemur að skuldadögum hjá öllum.   Líka skuldadögum loforðanna.  

SUMARSTUÐ Í ÝMSUM VEÐRUM

Það er gaman að ferðast um landið þótt það sé ekki alltaf sól og 20 stiga hiti. 

Það er merkilegt að sjá hversu fólk þyrpist til landsins, fyllir gistihús og hótel.  Sem heita orðið ýmsum fínum nöfnum; Country hotel, Restaurant, Café og Bar.   Sem maður efast oft um að standi undir nafni.  En það er gaman að fylgjast með brölti landans að taka þátt í upganginum.  Og margir gera vel, þótt eflaust séu ekki allir gististaðir og matstaðir eins og lofað er.   

Ég gisti á Hala, fín aðstaða í dýrasta lagi en það var þó morgunverður á Þórbergssetri. Spaugilegt að hafa heyskap fyrir utan gluggann hjá sér þangað til á ellefta tímanum á laugardagskvöldið!!! Og það er gaman að hitta ungt fólk sem ætlar að hjóla hringinn um landið komið alla leið frá Quebeck í Kanada.  Ansi viðkunnanlegt fólk.  Það var ánægt í morgun (sunnudag) að halda áfram í sóskininu. Hvoll, gististaður í Vallarbæjum, er austarlega í Vestur-Skaptafellssýslu, þægilegur áfangastaður.    

 Maturinn á Gistihúsinu á Egilsstöðum, snarl síðdegis, var frábær, lambahamborgari og humarsúpa, þjónustan og umhverfið óaðfinnanleg.  

Við gistum þarna fyrir 38 árum á hótelinu vorum veðurteppt í október það var ekki flogið í 4 daga!!! Það var erfitt að vera með 2 börn innan um skrautmuni og kristalglös!!!!  Ógleymanleg upplifun upp á lífstíð!!! 

Það er líka gaman að sjá hversu veiðarnar sem LÍÚ bölsótast yfir skapa mikið líf í flestums sjávarplássum tugir smábáta og trilla sem streyma út á gjöful mið og skila vinnslu í fiskvinnsluhúsum.   

Landinn hefur líkað tekið miklum framförum í akstri á þjóðvegunum fáir sem reyna að ryðjast fram úr þar sem ekki er leyfilegt.  Einn var þó minnisstæður á Hellisheiðinni æddi yfir á óbrotinni línu og spýtti stein á okkur, honum lá svo mikið á að komast í bæinn á risadekkjunum.  Vonandi hefur hann komist á réttum tíma.  Og rúðan slapp hjá okkur í þetta sinn.    

Það er fallegt um að lítast í sólarleysi, skýjabakkar sem æða um himin, skýjaskúrir sem þjóta yfir sjóndeildarhringinn, hella yfir okkur smádembu og eru svo horfnir.  Þannig er Ísland.  Hitinn ekki sérstaklega mikill, 12-18 stig, en léttara yfir mannfólkinu þegar sólin birtist.  

Gleðilegt sumar og sumarleyfi landar mínir elskulegu!  

Svo fékk ég dularfullt SMS austur á fjörðum:   Þetta er nýja símanúmerið mitt. Kveðja Davíð!!!  Svo er að leysa þessa erfiðu gátu.  Hvaðan kom þetta frá Davíð O., Sigmundi Davíð eða Davíð Húsverði !!!!!

Bessastaðablús

Sámur eða Ólafur. Val þjóðarinnar.

Ríkisstjórn: Orða vant

á sama degi: 

Jónas Fr. Jónsson skipaður formaður áhrifamikillar ríkisnefndar (LÍNE)  í umboði Illuga Gunnarssonar, einhvern veginn bjóst maður við öðru.

Vigdís Hauksdóttir opinberar fordóma sína og vanþekkingu: Maður bjóst ekki við öðru og þó.   

Hvað kemur næst?

 

Listasprang: Sinfó, leikhús og tónlist

Sinfonían í gærkvöldi.  Enn einir úrvals tónleikar, Beethoven og Prókofíeff, einn besti stjórnandi sem hefur komið hingað og verið hérna, Osmo Vänskä, við erum svo heppin.  Svo er það Harpan að heyra verk aftur eftir að hafa heyrt það í Háskólabíó.  Að byrja aftur á tónlistarsögunni með annan hljóm í eyrum.  

Ég fékk skrána fyrir næsta vetur inn um póstlúguna í gær, margt spennandi.  En sumt sem ekki er, furðulegt að sleppa.  Engir Verdi tónleikar, 200 ára árstíð hans líka, ekki bara Wagner, sérstaklega þegar maður veit að með góðum söngvurum og fínum forleikjum væri hægt að selja 3-4 tónleika.  Engir Britten tónleikar, eitt merkasta tónskáld seinustu aldar, 100 ára árstíð, dagskrárnefndin eitthvað úti að aka?    

Margir hafa furðað sig á Grímunni í ár,  margt skrítið, Makkbeð leikrit ársins, en hvorki Björn né Margrét, Ragnar Braga hefði auðvitað átt að fá sérstaka viðurkenningu sem nýr leikstjóri, en hann frekar en Þorleifur Örn eða Andrews sem leikstjóri ársins......  hálfgerður brandari. Nei ég skil ekki alltaf leikhúsheiminn enda algjör amatör á flestum sviðum.  

Svo er hátíðin hans Víkings Heiðars framundan, sem var frábær í fyrra.  Leitt að ég verð ekki í bænum þessa dagana.  Langtum skemmtilegri og frumlegri hátíð en Listahátíð.  Látið ykkur ekki vanta.  

Ég er einn af þeim sem er forvitinn fyrir nýjungum, svo ég setti Spotify inn hjá mér.  Einstaklega skemmtilegur tónlistarvefur.  Ótrúlega mikið af góðri tónlist.   Margt nýtt að uppgötva heilmikið af góðum djass, hef mikið hlustað á Ron Carter og ýmis afsprengi hans, sérstaklega með Eric Dolphy.  Svo hef ég uppgötvað íslenska hljómsveit sem ég hef að mestu leitt hjá mér.  Hjaltalín, diskurinn sem kom út fyrir jól; Enter 4.  Hann er eini orði sagt magnaður.  Sorglegur, frumlegur og spennandi.   Útsetningarnar, stundum einfaldar stundum skrautlegar og margbrotnar.  

                                      Freyja og Harpa 

Íhaldsstjórnin: Allt á sömu bókina lært!!!!

Nú hefur íhaldsstjórn tekið völd á Íslandi.  Þá breytist margt fólk vill oft gleyma því þegar það kýs slíka stjórn yfir sig. Og eitt er kannski verra en áður, það er greinilegur flutningur Framsóknar yfir á hægri vænginn, þar sem hann skákar Sjálfstæðinu að mörgu leyti í hreinni afturhaldsstefnu.   Það verða breytingar í velferðarmálum, utanríkis- og friðarmálum, í efnahags- og atvinnumálum.  Við sjáum strax margt á fyrstu dögum þessarar stjórnar.  

Nú er strax farið að tala um slæman viðskilnað fráfarandi stjórnar og það þurfi að skera niður.  Enn vitum við ekki hvað en fjármálaráðherrann minntist á nýlega settan á tannlæknakostnað barna. Það verður margt annað sannið þið til!!!  Og skattalækkanir hverjir fá þær????  

Á sama tíma leggur sjávarútvegs- og atvinnumálaráðherra frumvarp um  lækkun á veiðigjaldi  þar sem milljarða afsláttur kemur til framkvæmda seinni hluta þessa árs og á næsta ári: 

Gangi þessi áform frumvarpsins eftir má gera ráð fyrir að það muni fela í sér umtalsverða lækkun sérstaka veiðigjaldsins frá því sem reiknað var með á grundvelli nýlegra laga um veiðigjöld sem tóku gildi um mitt síðasta ár. Samkvæmt þeim lögum var gert ráð fyrir um 14 mia. kr. heildartekjum af veiðigjöldunum fiskveiðiárið 2013/2014 miðað við forsendur ríkisfjármálaáætlunar sem kynnt var sl. haust. Því er ljóst að verði frumvarp þetta að lögum mun það hafa töluverð áhrif til lækkunar á tekjuáætlun ríkissjóðs árin 2013 og 2014. Í meðfylgjandi töflu má sjá hvernig áætlað er að tekjur ríkissjóðs af veiðigjöldum fyrir aflaheimildir geti orðið á rekstrar- og greiðslugrunni fyrir þessi ár samkvæmt frumvarpinu borið saman við forsendur fjárlaga 2013 og ríkisfjármálaáætlunarinnar:

	2013			2014
mia. kr.	rg.	grgr.		rg.	grgr.
Ríkisfjármálaáætlun	13,5	12,6		16,2	14,5
Eftir breytingar	10,3	11,7		9,8	9,8
Munur	-3,2	-0,9		-6,4	-4,7

Verði frumvarpið óbreytt að lögum má gera ráð fyrir að tekjur ríkissjóðs af veiðigjöldum fyrir aflaheimildir verði 3,2 mia. kr. lægri á árinu 2013 frá því sem gert var ráð fyrir í fjárlögum og að tekjurnar geti orðið 6,4 mia. kr. lægri á árinu 2014 en áætlað var. Hins vegar má gera ráð fyrir að tekjuskattsgreiðslur sjávarútvegsfyrirtækja í ríkissjóð muni aukast að einhverju marki þar sem veiðigjöld eru frádráttarbær rekstrarkostnaður. Á þessu stigi liggja ekki fyrir aðrar ráðstafanir til að vega upp á móti þessari lækkun á áformaðri tekjuöflun ríkissjóð. Því verður að gera ráð fyrir að staða ríkissjóðs muni versna sem nemur þessari umtalsverðu tekjulækkun frá því sem áformað var og að þar með verði til muna lengri leið að jöfnuði í heildarafkomunni en gert hafði verið ráð fyrir í ríkisfjármálaáætlun sem fylgdi með fjárlagafrumvarpi fyrir árið 2013.

Athygli mín beinist að ábendingu athugsemda við frumvarpið  um skuldastöðu sjávarútvegsfyrirtækja: 

Á sama hátt er rétt að vekja athygli á því að sjávarútvegsfyrirtæki hafa greitt niður skuldir á síðustu árum. Á eftirfarandi yfirliti má sjá skuldir sjávarútvegsfyrirtækja 2008–2011 samkvæmt upplýsingum frá Hagstofu Íslands:

Ár	Milljarðar kr.
2008	523
2009	541
2010	473
2011	443

Ætli þessi minnkun á skuldum séu vegna greiðsla frá fyrirtækjunum eða niðurfellingu á skuldum frá bönkum?  Ansi virðast þessi fyrirtæki vera mörg örlát að greið út arð til eigenda.  

Utanríkisráðherra hættir sér út fyrir landsteinana og gefur út yfirlýsingu í Brüsssel auðvitað í hreiðri NATO :

Aukin áhersla verður lögð á verkefni Íslands innan Atlantshafsbandalagsins á komandi árum segir Gunnar Bragi Sveinsson, nýr utanríkisráðherra. Hann segir að ný ríkisstjórn verði viljugri þáttakandi í starfi bandalagsins en sú stjórn sem fyrir var.

Líklega þarf ekki að hugsa um fjármagn til þess!!!!  Það greiða vígaherrarnir með glöðu geði!! Og það eru fleiri glannalegar yfirlýsingar: 
 „Það verður enginn vandræðagangur núna að geta sagt við NATO og við bandalagsþjóðirnar að við berum þarna skyldu sem við ætlum okkur að axla. Það hefur stundum verið vandræðagangur á því sem verður ekki núna,“ segir hann.
 „Sú breyting þýðir ekki að við ætlum að fara að taka þátt í einhverju hernaðarbrölti heldur bara að við leggjum áherslu á það við okkar bandalagsþjóðir að við erum fullgildir meðlimir að NATO og munum sinna því eins vel og við getum á okkar forsendum,“ segir Gunnar Bragi.

Er það furða að manni verði flökurt.  

Menntamálaráðherrann setur fram fyrsta frumvarp sitt og auðvitað er það að færa heiminn nokkur skref til baka að taka aftur upp pólítíska stjórnun á RÚV: 

Í frumvarpi þessu eru lagðar til breytingar á fyrirkomulagi tilnefninga í stjórn Ríkisútvarpsins ohf. Samkvæmt núgildandi lögum skipar ráðherra fimm manns og jafnmarga til vara í sérstaka valnefnd til tveggja ára í senn, allsherjar- og menntamálanefnd Alþingis tilnefnir þrjá fulltrúa og jafnmarga til vara, Bandalag íslenskra listamanna tilnefnir einn fulltrúa og annan til vara og samstarfsnefnd háskólastigsins tilnefnir einn fulltrúa og annan til vara. Hlutverk valnefndar er síðan að tilnefna fimm fulltrúa í stjórn félagsins og fimm til vara. Í frumvarpinu er gert ráð fyrir að í stað þess að stjórnarmenn séu tilnefndir af valnefndinni tilnefni Alþingi stjórnarmenn í hlutbundinni kosningu. Ekki eru hins vegar lagðar til breytingar á fjölda stjórnarmanna Ríkisútvarpsins ohf. og verða þeir áfram sjö talsins.
    Verði frumvarpið óbreytt að lögum má gera ráð fyrir að lítils háttar rekstrarkostnaður geti sparast hjá félaginu með niðurlagningu valnefndarinnar. Hins vegar mun lögfesting frumvarpsins ekki hafa áhrif á framlög til fyrirtækisins úr A-hluta ríkissjóðs.

Loks nefni ég frumvarpið sem allir landsmenn hafa beðið eftir:  Um skuldastöðu heimilanna og ennþá þrátt fyrir að þetta var aðalkosninga og sigurmál Framsóknarflokksins virðast þeir ekki tilbúnir með tillögur og það á að leggja í mikla vinnu að kanna þennan málaflokk sem þeir hefðu mátt segja sér fyrir kosningar í staðinn fyrir að vera með ódýr kosningaloforð um flýtigang og forgang þessara mála sem eru satta að segja ákaflega flókin. 

Aðgerðaáætlun.

    1.     Settur verði á fót sérfræðingahópur sem útfæri mismunandi leiðir til að ná fram höfuðstólslækkun verðtryggðra húsnæðislána og geri tillögur þar að lútandi. Tillögur liggi fyrir í nóvember 2013. 
                Ábyrgð: Forsætisráðherra og ráðherranefnd um úrlausnir í skuldamálum heimilanna.    2.     Gerð verði úttekt á kostum og göllum þess að stofna sérstakan leiðréttingarsjóð vegna húsnæðislána. Tillögur að mögulegum útfærslum liggi fyrir í nóvember 2013. 
                Ábyrgð: Forsætisráðherra.
    3.     Kannað verði hvernig gera megi eigendum yfirskuldsettra íbúða kleift að losna án gjaldþrots undan eftirstöðvum sem veðið sjálft stendur ekki undir. Um verði að ræða tímabundna aðgerð sem miði að því að leysa vanda tengdan afleiðingum efnahagshrunsins. Niðurstaða liggi fyrir í september 2013. 
                Ábyrgð: Innanríkisráðherra og félags- og húsnæðismálaráðherra.
    4.     Skipuð verði verkefnisstjórn um framtíðarskipan húsnæðismála. Tillögur liggi fyrir í upphafi árs 2014. 
                Ábyrgð: Félags- og húsnæðismálaráðherra.
    5.     Lögfest verði flýtimeðferð dómsmála sem tengjast skuldavanda heimilanna og varða ágreining um lögmæti þess að binda fjárskuldbindingu við gengi erlendra gjaldmiðla eða vísitölu. Frumvarp lagt fram á sumarþingi 2013. 
                Ábyrgð: Innanríkisráðherra.
    6.     Settur verði á fót sérfræðingahópur um afnám verðtryggingar af neytendalánum. Tillögur og tímasett áætlun liggi fyrir í lok árs 2013. 
                Ábyrgð: Forsætisráðherra. 
    7.     Kannað verði hvernig eignalausum einstaklingum verði gert kleift að greiða kostnað vegna gjaldþrotaskipta á búi sínu. Tillögur liggi fyrir í september 2013. 
                Ábyrgð: Félags- og húsnæðismálaráðherra og innanríkisráðherra.
    8.     Sérfræðingahópur meti möguleika á því að leggja gjald á fjármálafyrirtæki vegna umtalsverðra tafa á endurútreikningi lána. Tillögur liggi fyrir í ágúst 2013. 
                Ábyrgð: Fjármála- og efnahagsráðherra.
    9.     Stimpilgjöld af lánsskjölum verði endurskoðuð og stefnt að afnámi stimpilgjalda vegna kaupa einstaklinga á húsnæði til eigin nota. Frumvarp verði lagt fram á haustþingi 2013. 
                Ábyrgð: Fjármála- og efnahagsráðherra.
    10.     Hagstofa Íslands fái skýrar heimildir til að afla upplýsinga frá fjármálafyrirtækjum um fjárhagsstöðu heimila og fyrirtækja. Frumvarp verði lagt fram á sumarþingi 2013. 
                Ábyrgð: Forsætisráðherra. 
    Samræming og eftirfylgni vegna aðgerðanna verði í höndum sérstakrar ráðherranefndar um úrlausnir í skuldamálum heimilanna sem hafi yfirsýn yfir aðgerðirnar og tryggi samræmi á milli þeirra. Nefndin skoði einnig aðrar leiðir sem mögulegar eru til þess að ná sömu markmiðum og tryggja samráð við þá aðila sem málið varðar þannig að sem víðtækust sátt verði um útfærslu aðgerðanna. 
    Forsætisráðherra gefi Alþingi skýrslu um stöðu mála í upphafi haustþings 2013 og síðan aftur í upphafi vorþings 2014.

Svo, lesendur góðir, við sjáum þessi fyrstu skref þessarar íhaldsstjórnar, ég hef ekki rætt um þjóðmenningar og þjóðernishugmyndir stjórnarinnar, geri það örugglega seinna!!!!

Ef menn vilja kynna sér frumvörpin þá er fínt að skoða Alþingi.is!!!