Kammermúsík: Guðdómur og loddaraskapur

Það eru sumir sem halda að það þurfi lítið til að ná valdi á því að spila klassíska tónlist, jazz eða verða meistarar í samningu góðra dægurlaga eða ná valdi að meistaraspilamennsku í rokktónlist. 

Í allt þetta þarf endalausa æfingu og lærdóm út ævina.  Samt halda margir eða segja það þótt þeir viti betur að þetta fólk eigi að stunda þessar listir í frístundum og vera í almennilegri vinnu á daginn.  Oft er þetta sagt í pólitískum loddaraskap til að koma með billegar lausnir á erfiðum efnahagslegum og fjármálalegum vandamálum.  Eða þetta er sagt af kjánaskap og heimsku. 

Ég var að hugsa þetta þegar ég kom heim af tónleikum Kammermúsíkklubbsins í Hörpunni í gærkvöldi.  Kammermúsíkklúbburinn er klúbbur áhugamanna um stofutónlist og var stofnaður fyrir nokkrum áratugum af þeim sem þóttu þeir heyra of sjaldan hágæðaflutning af slíkri tónlist hér á landi.  Það gera þeir sem stýra þessu af áhuganum einum og þiggja engin laun.  En þeir þurfa flytjendur sem ráða við þessa oft á tíðum erfiðu tónlist, það getur verið ótrúlega erfitt að spila þetta.  

Við sáum það í gærkvöldi að svo er.  Við heyrðum verk eftir Spánverja sem lifði og dó (allt of fljótt) á fyrri hluta 19. aldar.  Arriaga heitir hann og samdi kvartetta sína 16 ára gamall, ofsafín verk, leiftrandi eins og Mozart og leikandi.  Það er eitt hlutverk klúbbsins að vekja athygli á tónskáldum sem sjaldan eða aldrei hafa verið spiluð á Íslandi.  Á eftir Arriaga voru svo spilaðir stórmeistarar kammermúsíkurinnar, Beethoven og Brahms.  Og ekki það sísta, fyrir hlé var fluttur kvartett ópus 132.  Sem ég held ég geti fullyrt sé ein af erfiðustu og mögnuðustu tónsmíðum sögunnar.  Að eiga listamenn sem geta spilað þetta í heimsklassa eins og við heyrðum í gærkvöldi, sunnudag, er nokkuð sem smáþjóð getur verið stolt af.  Allir meðlimir kvartettsins, Sigrún Eðvaldsdóttir, Zibignew  Dubik,  Ásdís Valdimarsdóttir og Bryndís Halla Gylfadóttir eru meistarar á sín hljóðfæri.   Í svona spilamennsku þarf áratuga þjálfun og vinnu, þetta er ekkert til að skvera svona út úr erminni eins og sumir halda.  Það er ekki hægt að koma nær guðdóminum heldur en að hlusta á svona verk og túlkun.  Meira að segja Brahms, Strengjakvartett númer 1, sem ég kann vel að meta, hljómaði fölur eftir Beethoven keyrsluna (konan mín var nú ekki sammála um það), en hann á eftir að hljóma vel í annað sinn.

Já lesendur góðir, það er ýmislegt heilarót sem fer af stað eftir að hafa verið í Hörpunni sem sumir vilja bara rífa svona einn tveir og þrír, þannig var í þetta sinn.  Það kostar peninga að halda uppi tónlistarskólum, listaháskólum og húsakynnum til að flytja þessi verk.  En það gefur í staðinn svo ótrúlega mikið.  Þetta er líka einn af þáttunum sem útlendingar tala um í sambandi við landkynningu, það er tónlist myndlist og bókmenntir. Það er skrítið að upplifa það að íslenskur rithöfundur sem hefur lítið selst heima á Íslandi en selst allt í einu í tugum og jafnvel hundruðum þúsunda eintaka í Frakklandi.  Björk, Emilíana Monsters of Men og Sigurrós fara víða um heim,  við eigum ótrúlegan hóp tónlistarmanna, í klassík, jazz, dægurlagatónlist. Myndlistarmenn okkar vekja víða athygli fyrir frumleik og sköpunargáfu.  Handiðnaðarfólk skín.  Kvikmyndafólk okkar er meira að segja komið til Hollywood (ef það er það sem skiptir mestu máli)  !!!!! Þeir sem horfa á þetta að utan furða sig á þessum 350000 manna eyjarskeggjum sem virðist ekkert vera ómögulegt.  

Mikið væri skemmtilegra að heyra frá valdamönnum og almenningi ánægjuorð og gleði yfir því sem listamenn okkar gera. Láta það hljóma hátt.   Þrasið og kveinið verður oft svo slítandi.  Það myndi gera heiminn bjartari og sólríkari.  

Misnotkun: Bragi skákar og mátar

Það er svo að stundum eru listaverk grimm og koma verulega við mann.  Jafnvel er hægt að gera það með gríni og ærslum.  Þannig er það með leikrit Braga Ólafssonar, Maður að mínu skapi.   Það er erfitt að standa frammi fyrir því að fólk hegði sér ekki eins og maður vill, við óskum þess að fólk sé gott innan gæsalappa.  Noti ekki gáfur sínar, völd og auð til að misnota aðra.  Í þessu verki er því þannig hagað,  misnotkun er aðalþema þessa leikrits.  Manni verður oft hálfómótt yfir því hversu langt það getur gengið.   Sá ríki og sá sem hefur valdið treður á öðrum. Ég held að áhorfendur í Þjóðleikhúsinu eiga erfitt að horfast í augu við það. Því hafa móttökurnar verið misjafnar. 

Þetta verk er í anda fyrri verka Braga, bæði skáldsagna og leikrita.  En hér bregður hann meira á leik í ýmsar áttir, þetta er stofuleikur eins og við höfum séð mikið af í gegnum árin úr breskum leikritaheimi,  svo verður heimurinn á sviðinu absúrd, við fáum ekki að gleyma því að við erum í leikhúsi, og við okkur blasir grátt gaman. Sem umbreytist í ærsli og loks ......... ?  

Gagnrýnt hefur verið að stældar séu lifandi persónur, úr Háskólaheiminum og stjórnmálalífi.  Auðvitað sér maður líkindi en þannig er það nú,  skáldskapur er ekki svo langt frá veruleikanum.  Og það særir okkur.  Sérstaklega þegar hann er svo listilega á svið settur.  

Leikhústöfrarnir skína út frá leikurunum, Ólafía Hrönn leikur Berthu, brussa og alþýðustúlka, sem er kannski ekki öll sem hún er séð.  Minnir á stúlkurnar hjá Laxness.  Dóróthea, saklaus yfirstéttarkona, sem á góðar senur eins og þegar hún tekur dansspor á sviðinu, hún minnir okkur á að konur hátt á áttræðisaldri geta verið kynþokkafullar!!!!  Kristbjörg Kjeld er enn í fullu fjöri.  Ungi maðurinn sem er leikinn af Þorleifi Einarssyni,  er leiksoppur valdamannanna en reynir að bíta frá sér, en á auðvitað ekki roð í stórbokkana þegar upp er staðið.  En hann sér heiminn í öðru ljósi eftir þessa atburðarás.  Bróðir Berthu, Agnar, sem Þorsteinn Bachmann gerir góð skil, sem hefur alla ævi orðið að fylgjast með þeim sem valdið hafa, í skóla og í starfi sem lögfræðingur.  Auðvitað verður hann líka fórnarlamb enn einu sinni.  

Svo eru það stórauðmennirnir, borgarastéttin holdi klædd.  Sem hafa alltaf komist áfram í sínum heimi.  Þótt ólíkir séu.  

Lífsnautnamaðurinn Guðgeir, enn ein furðupersóna í höndum Eggerts Þorleifssonar, sem getur alltaf hagrætt og stjórnað öllu í sínu umhverfi þar sem allt er svo fullkomið, alltaf óaðfinnanlegur, vel klæddur, drekkur bara það bezta, reynir að útbreiða rauðu sloppatískuna,  en bak við þetta mjúka yfirborð er skrímsli sem fyrirlítur þá sem minna mega sín og kann á þetta fyrirbæri sem einkenni svo þessa sýningu það er MISNOTKUN. 

Seinastur en ekki síztur er Klemens, sem hefur komist allra sinna leiða með frekju og yfirgangi, hann svífst einskis til að fullnægja löstum og hvötum sínum.  Sjaldan hef ég séð ógeðslegri persónu á sviði.  Pálmi Gestsson er alltaf að verða betri og betri, hann er ekki beint meðmæli með áfengisdrykkju í þetta sinn, þvílíkur tuddi!!! 

Ég fór í Þjóðleikhúsið á föstudagskvöldið með óróa í huga eftir að hafa lesið frekar dræmar útleggingar sérfræðinga leikhúslífsins. En mér þótti allar efasemdir feykjast í burtu.  Mér finnst Bragi hafa bætt við sig einni „rós í hnappagatið", sem passar svo sem vel við yfirborð þessarar sýningar.  En við upplifum óréttlæti þjóðfélagsins sem við lifum í þar sem þeir sem eiga auð og völd geta traðkað á smælingjunum.  Þótt þeir hafi spilað illa úr spilunum sem þeir hafa á hendi fá þeir alltaf alslemmu, allt kerfið byggist upp á því.  Við höfum séð það seinustu árin.   Við tökum við pústrunum með bros á vör. Eða hvað??   


  

Ríkisstjórnin: Nýr áróðursmeistari

Ég sé að ríkisstjórnin er búin að ráða nýjan upplýsingafulltrúa.  Sigurð Má Jónsson. Vanan blaðahauk, af Morgunblaði og Viðskiptablaði, og varaformaður Blaðamannafélagsins.  Sannur fulltrúi þess sem núverandi ríkisstjórn stendur fyrir.  Það fyndna séð út frá mínum sjónarhóli er það að ég skrifaði blogg um hann út frá pistli sem hann skrifaði fyrir nokkrum vikum síðan.  Svo lokaorðin í þeim pistli eiga vel við í dag.   Langtum meira en þá.  Þetta eru lokaorðin:

Já það er erfitt að sjá allt fyrir á þessum óróatímum.  En að fara að kenna seinustu ríkisstjórn um alla óáran í heiminum er fáránlegt ef ekki heimskulegt. Hún reyndi sitt bezta við erfiðar aðstæður og náði ótrúlegum árangri  að mörgu leyti.  Sigmundur Davíð og Bjarni héldu sínar ræður í gríð og erg á seinasta þingtímabili um það hve auðvelt væri að gera betur.  Nú gefst þeim tækifæri á að sýna það, byrjunin lofar ekki góðu.  Hvað sem Sigurður Már Jónsson segir.  Vonandi segir Sigurður Már okkur raunsannar fréttir af þeim félögum næstu árin.  En ég efa það.  Hann hlustar of mikið á rödd Meistarans. Og Meistarinn er Frjálshyggja á hverfanda hveli.

Ætli við óskum ekki ríkisstjórninni til hamingju með þennan nýja áróðursmeistara, hann mun segja okkur fréttir af afrekum meirihlutans. Sem ég er hræddur um að verði ekki þjóðinni til heilla. Því mörg okkar trúa því sem stendur á vegg Tukthússins á Skólavörðustig.  Öðruvísi veröld er möguleg.

 

Auðlindaráðherra: Böðull náttúrunnar

Þá er enn ein „tilskipun" komin frá ráðherranum sem hefur gleymt verksviði sínu í öðru ráðuneyti sínu, það heitir ekki Umhverfis- og auðlindaráðherra.  Þá má strika yfir Umhverfis og.  Þá sjáum við hvað er eftir. 
Ráðherra ætlar að afturkalla lög þetta sýnist mér vera ný vinnubrögð.  Fyrstu tvær línurnar eru bara bull.
Jú í annarri efnisgreininni uppgötvar hann og lögfræðingar hans að þetta sé ekki hægt. Svo Alþingi á að fá að koma að málinu.  Til að afturkalla núverandi lög.  Og láta hin gömlu og góðu taka gildi.  Lögin nr 44/1999.

Svo á ráðuneytið að búa til ný lög.   Markmiðið er: 

að styrkja stöðu náttúruverndar og ná um þau sátt. 
Gert er ráð fyrir að nýtt frumvarp til náttúruverndarlaga verði lagt fram til umfjöllunar Alþingis, þegar framangreindri vinnu er lokið.  (takið eftir engin tímasetning) 

Við þá vinnu verður m.a. stuðst við þær fjöldamörgu athugasemdir sem liggja fyrir frá vinnunni við frumvarpið sl. vetur, auk þess sem haft verður samráð við hagsmunaaðila. (meðal annars, já meðal annars, hvað annað?, og hafa samráð við hagsmunaaðila, ætli það hafi ekki verið gert seinustu árin!!!) 

 
afar mikilvægt að ný náttúruverndarlög feli í sér skýrar skyldur og jafnframt skýra framkvæmd, náttúruvernd til hagsbóta. Er ekki síður mikilvægt að slíkar breytingar séu unnar í sem víðtækastri sátt við haghafa og almenning.

Já lesendur góðir það er auðséð hvað felst í þessu brölti ráðherrans, það er ekki náttúruvernd til hagsbóta. Það get ég fullyrt.  Það er til þess að böðlar náttúrunnar hafi frjálsar hendur, til að gera það sem þeim sýnist til að níðast á náttúru landsins.  Svo liggur ráðherranum mikið á að í tilkynningunni verður til nýyrði.  Haghafi.  Það væri gaman að fá skilgreiningu á því orði.  


hér er tillkynning Auðlindaráðherrans:  

Lög um náttúruvernd afturkölluð

Umhverfis- og auðlindaráðherra hefur ákveðið að afturkalla lög um náttúruvernd nr. 60/2013 sem voru samþykkt á Alþingi rétt fyrir þinglok í vor. Lögum þessum var ætlað að taka gildi 1. apríl 2014.

Ráðherra hefur ákveðið að leggja fram frumvarp á Alþingi þegar þing kemur saman í haust með tillögu um að fella úr gildi hin nýju náttúruverndarlög nr. 60/2013, sem annars tækju gildi 1. apríl 2014. Verði það frumvarp samþykkt á Alþingi verður í raun engin breyting heldur munu núgildandi náttúruverndarlög nr. 44/1999 halda áfram gildi sínu. Hyggst ráðherra jafnframt fela umhverfis- og auðlindaráðuneytinu að hefja endurskoðun á náttúruverndarlögunum með það að markmiði að styrkja stöðu náttúruverndar og ná um þau sátt. Gert er ráð fyrir að nýtt frumvarp til náttúruverndarlaga verði lagt fram til umfjöllunar Alþingis, þegar framangreindri vinnu er lokið. Við þá vinnu verður m.a. stuðst við þær fjöldamörgu athugasemdir sem liggja fyrir frá vinnunni við frumvarpið sl. vetur, auk þess sem haft verður samráð við hagsmunaaðila.

Ljóst er að huga þarf nánar að veigamiklum atriðum vegna vinnu við gerð nýs frumvarps til laga um náttúruvernd, eins og kom fram í umfjöllun um frumvarp til nýrra náttúruverndarlaga sl. vetur. Hér er um ýmis grundvallaratriði að ræða enda afar mikilvægt að ný náttúruverndarlög feli í sér skýrar skyldur og jafnframt skýra framkvæmd, náttúruvernd til hagsbóta. Er ekki síður mikilvægt að slíkar breytingar séu unnar í sem víðtækastri sátt við haghafa og almenning.

Merkel: Mamman heldur um budduna......

Enn á ný er Angela Mamma Menkel í stólnum, það eru fáir stjórnmálamenn sem geta státað af því seinustu árin.   Hún þorir að segja nei, hefur gamaldags gildi, og klæðir sig smekklaust.  En mikið er hún nú geðslegri en Járnfrúin var í Bretlandi.   Það er nú ekki svo að ég færi að kjósa hana ef ég hefði rétt til þess, grunngildi okkar eru ansi mikið ólík.  

Meira að segja nakin (er myndin fölsuð eða ekki)  er allt í lagi með hana. Enda er sú mynd frá Austur-Þýzkalandi þar voru alltaf allir naktir eins og við vitum öll!!!!  Ég las einhvern tíma að Berlínar Filharmonían hefði sent henni ársmiða að tónleikunum, hún sendi greiðslu fyrir miðunum tveimur til baka.  Sagðist hafa efni á því að borga.  Auðvitað er þetta haugalygi (eða ekki) en þetta sýnir hvaða sýn fylgjendur hennar hafa á henni.  

Það er nú líka merkilegt að Die Linken (kommarnir eins og sumir segja) sé orðinn þriðji stærsti flokkurinn í Þýskalandi.  Fyrir ofan Græna og Frjálslynda.  Einhvern tíma hefði það þótt merkileg tíðindi.  Og Píratarnir skora ekki hátt um 2 prósent.  

Haustak: Forsetinn enn einn á ferð

Enn er forseti vor á ferð, hitti hann Ban Ki-moon í New York.  Hvað var forsetinn að ræða við framkvæmdastjóra SÞ?   Framkvæmdastjórinn styður alþjóðlegt samstarfsverkefni um þurrkun matvæla.  Ekki er tekið fram hvernig, fjárhagslega eða málefnalega? Í fréttatilkynningunni segir þetta:   


Samtvinnun hreinnar orku og eflingar fæðuöryggis í veröldinni er eitt af meginviðfangsefnum Sameinuðu þjóðanna á nýrri öld. Íslendingar hafa í áratugi þurrkað þorskhausa, beinagarða og annað sjávarfang, sem áður var hent, og flutt út til Afríku þar sem þær afurðir nýtast almenningi. Að undanförnu hefur fyrirtækið Haustak á Reykjanesi einnig þurrkað kjöt, ávexti og grænmeti í tilraunaskyni og sýnir sú reynsla að þurrkunaraðferðum Íslendinga má beita á margvíslegar afurðir.

Já lesendur góðir það er fyrirtækið Haustak sem vinnur að þessu hjá okkur, hvorki meira né  minna. Það eru margir starfsmenn SÞ sem taka þátt í þessum umræðum.  En enginn fulltrúi fagráðuneyta íslenskra, enginn fulltrúi Umhverfis og auðlindaráðuneytis, enginn fulltrúi  atvinnumálaráðuneyta íslenskra.  Enda sér Forsetinn um þetta fyrir okkur. Hver er færari? 

   
Síðan var rætt um aukið samstarf á Norðurslóðum. Þar sem forsetinn ætlar að standa fyrir Hringborði Norðurslóða (Arctic Circle) í næsta mánuðu (október) í Hörpu að sjálfsögðu. Ekki hafði ég heyrt minnst á það áður.  En það sem er merkilegt að hvergi er að finna orð um þetta þing, á forsetaskrifstofusíðunum, ráðuneytissíðum, en loksins fann ég á google upplýsingar.  og þetta.  Þetta virðist ætla að vera mikið húllumhæ.  

Það er ýmislegt sem forsetinn brallar. Auðvitað allt fyrir okkur.Það er spurningin á hverjum hann hafi Haustak.  

Svo fræddi Framkvæmdarstjórinn Forseta okkar um Sýrland og samninga þar af lútandi.  Það er gott að hann hafi sem mesta vitneskju um það. Kannski hann skili kveðju til utanríkis eða forsætisráðherra???? 

Hér er fréttatilkynningin í heilu lagi: 

Fréttatilkynning
frá
skrifstofu forseta Íslands
FUNDUR FORSETA OG BAN KI-MOON
FÆÐUÖRYGGI FÁTÆKRA ÞJÓÐA
REYNSLA ÍSLENDINGA AF ÞURRKUN MATVÆLA
Forseti Íslands Ólafur Ragnar Grímsson átti síðdegis í gær, 20. september, fund með Ban Ki-moon, framkvæmdastjóra Sameinuðu þjóðanna, í höfuðstöðvum samtakanna í New York. Á fundinum kom fram eindreginn stuðningur Ban Ki-moon við alþjóðlegt samstarfsverkefni um þurrkun matvæla sem byggt yrði á reynslu Íslendinga af þurrkun sjávarafurða. Fyrr um daginn átti forseti fund um þetta verkefni með nokkrum æðstu yfirmönnum Sameinuðu þjóðanna.
Samtvinnun hreinnar orku og eflingar fæðuöryggis í veröldinni er eitt af meginviðfangsefnum Sameinuðu þjóðanna á nýrri öld. Íslendingar hafa í áratugi þurrkað þorskhausa, beinagarða og annað sjávarfang, sem áður var hent, og flutt út til Afríku þar sem þær afurðir nýtast almenningi. Að undanförnu hefur fyrirtækið Haustak á Reykjanesi einnig þurrkað kjöt, ávexti og grænmeti í tilraunaskyni og sýnir sú reynsla að þurrkunaraðferðum Íslendinga má beita á margvíslegar afurðir.
Í heimsókn Ban Ki-moon til Íslands kynnti forseti framkvæmdastjóran-um hugmyndir um alþjóðlegt samvinnuátak á þessu sviði og voru fundirnir í New York framhald af þeim viðræðum.
Framkvæmdastjóri Sameinuðu þjóðanna lýsti einnig miklum áhuga á auknu samstarfi á Norðurslóðum og kynnti forseti honum alþjóðlegt þing, Hringborð Norðurslóða – Arctic Circle, sem haldið verður á Íslandi 12.-14. október, en þar verða þátttakendur frá ríkjum Norðurslóða, Asíu og Evrópu.
Framkvæmdastjóri Sameinuðu þjóðanna gerði einnig grein fyrir stöðu mála í Sýrlandi og tilraunum sínum og Sameinuðu þjóðanna til að treysta þá samninga sem unnið hefur verið að undanfarið.
Fundinn með framkvæmdastjóra Sameinuðu þjóðanna sátu einnig Gréta Gunnarsdóttir, sendiherra Íslands hjá Sameinuðu þjóðunum, Jón Erling Jónasson varafastafulltrúi og Örnólfur Thorsson forsetaritari.
Fundinn um fæðuöryggi og þurrkun matvæla sátu Robert Orr, aðstoðarframkvæmdastjóri á sviði stefnumótunar, Kandeh Yumkella, sérstakur fulltrúi framkvæmdastjóra Sameinuðu þjóðanna í málefnum hreinnar orku, Sigrid Kaag, aðstoðarframkvæmdastjóri Þróunarstofnunar Sameinuðu þjóðanna, UNDP, David Nabarro, sérlegur fulltrúi framkvæmdastjóra Sameinuðu þjóðanna á sviði fæðuöryggis, og Anthea Webb, stjórnandi á sviði fæðu- og næringarmála.
Mynd frá fundi forseta með framkvæmdastjóra Sameinuðu þjóðanna má nálgast á heimasíðu embættisins.
21. september 2013
Nánari upplýsingar veita skrifstofa forseta Íslands (540 4400), Örnólfur Thorsson forsetaritari (896 3028) og Árni Sigurjónsson skrifstofustjóri (820 4946). 

Svo er gott að glugga í hvað segir um embætti og stöðu Forseta Íslands í stjórnarskránni.... 

12. gr. Forseti lýðveldisins hefur aðsetur í Reykjavík eða nágrenni. 13. gr. Forsetinn lætur ráðherra framkvæma vald sitt.
 Ráðuneytið hefur aðsetur í Reykjavík. 14. gr. Ráðherrar bera ábyrgð á stjórnarframkvæmdum öllum. Ráðherraábyrgð er ákveðin með lögum. Alþingi getur kært ráðherra fyrir embættisrekstur þeirra. Landsdómur dæmir þau mál. 15. gr. Forsetinn skipar ráðherra og veitir þeim lausn. Hann ákveður tölu þeirra og skiptir störfum með þeim. 16. gr. Forseti lýðveldisins og ráðherrar skipa ríkisráð, og hefur forseti þar forsæti.
 Lög og mikilvægar stjórnarráðstafanir skal bera upp fyrir forseta í ríkisráði. 17. gr. Ráðherrafundi skal halda um nýmæli í lögum og um mikilvæg stjórnarmálefni. Svo skal og ráðherrafund halda, ef einhver ráðherra óskar að bera þar upp mál. Fundunum stjórnar sá ráðherra, er forseti lýðveldisins hefur kvatt til forsætis, og nefnist hann forsætisráðherra. 18. gr. Sá ráðherra, sem mál hefur undirritað, ber það að jafnaði upp fyrir forseta. 19. gr. Undirskrift forseta lýðveldisins undir löggjafarmál eða stjórnarerindi veitir þeim gildi, er ráðherra ritar undir þau með honum. 20. gr. Forseti lýðveldisins veitir þau embætti, er lög mæla.
 Engan má skipa embættismann, nema hann hafi íslenskan ríkisborgararétt. Embættismaður hver skal vinna eið eða drengskaparheit að stjórnarskránni.
 Forseti getur vikið þeim frá embætti, er hann hefur veitt það.
 Forseti getur flutt embættismenn úr einu embætti í annað, enda missi þeir einskis í af embættistekjum sínum, og sé þeim veittur kostur á að kjósa um embættaskiptin eða lausn frá embætti með lögmæltum eftirlaunum eða lögmæltum ellistyrk.
 Með lögum má undanskilja ákveðna embættismannaflokka auk embættismanna þeirra, sem taldir eru í 61. gr. 21. gr. Forseti lýðveldisins gerir samninga við önnur ríki. Þó getur hann enga slíka samninga gert, ef þeir hafa í sér fólgið afsal eða kvaðir á landi eða landhelgi eða ef þeir horfa til breytinga á stjórnarhögum ríkisins, nema samþykki Alþingis komi til. 22. gr. [Forseti lýðveldisins stefnir saman Alþingi eigi síðar en tíu vikum eftir almennar alþingiskosningar. Forsetinn setur reglulegt Alþingi ár hvert.]^1)
   1)L. 56/1991, 3. gr. 
 23. gr. Forseti lýðveldisins getur frestað fundum Alþingis tiltekinn tíma, þó ekki lengur en tvær vikur og ekki nema einu sinni á ári. Alþingi getur þó veitt forseta samþykki til afbrigða frá þessum ákvæðum.
 [Hafi Alþingi verið frestað getur forseti lýðveldisins eigi að síður kvatt Alþingi saman til funda ef nauðsyn ber til. Forseta er það og skylt ef ósk berst um það frá meiri hluta alþingismanna.]^1)
   1)L. 56/1991, 4. gr. 
 24. gr. Forseti lýðveldisins getur rofið Alþingi, og skal þá stofnað til nýrra kosninga, [áður en 45 dagar eru liðnir frá því er gert var kunnugt um þingrofið],¹⁾ enda komi Alþingi saman eigi síðar en [tíu vikum]¹⁾ eftir, að það var rofið. [Alþingismenn skulu halda umboði sínu til kjördags.]^1)
   1)L. 56/1991, 5. gr. 
 25. gr. Forseti lýðveldisins getur látið leggja fyrir Alþingi frumvörp til laga og annarra samþykkta. 26. gr. Ef Alþingi hefur samþykkt lagafrumvarp, skal það lagt fyrir forseta lýðveldisins til staðfestingar eigi síðar en tveim vikum eftir að það var samþykkt, og veitir staðfestingin því lagagildi. Nú synjar forseti lagafrumvarpi staðfestingar, og fær það þó engu að síður lagagildi, en leggja skal það þá svo fljótt sem kostur er undir atkvæði allra kosningarbærra manna í landinu til samþykktar eða synjunar með leynilegri atkvæðagreiðslu. Lögin falla úr gildi, ef samþykkis er synjað, en ella halda þau gildi sínu. 27. gr. Birta skal lög. Um birtingarháttu og framkvæmd laga fer að landslögum. 28. gr. Þegar brýna nauðsyn ber til, getur forsetinn gefið út bráðabirgðalög [er Alþingi er ekki að störfum].¹⁾ Ekki mega þau þó ríða í bág við stjórnarskrána. Ætíð skulu þau lögð [fyrir Alþingi þegar er það er saman komið á ný].¹⁾
 [Samþykki Alþingi ekki bráðabirgðalög, eða ljúki ekki afgreiðslu þeirra innan sex vikna frá því að þingið kom saman, falla þau úr gildi.]¹⁾
 Bráðabirgðafjárlög má ekki gefa út, ef Alþingi hefur samþykkt fjárlög fyrir fjárhagstímabilið.
   ¹⁾L. 56/1991, 6. gr. 
 29. gr. Forsetinn getur ákveðið, að saksókn fyrir afbrot skuli niður falla, ef ríkar ástæður eru til. Hann náðar menn og veitir almenna uppgjöf saka. Ráðherra getur hann þó eigi leyst undan saksókn né refsingu, sem landsdómur hefur dæmt, nema með samþykki Alþingis. 30. gr. Forsetinn veitir, annaðhvort sjálfur eða með því að fela það öðrum stjórnvöldum, undanþágur frá lögum samkvæmt reglum, sem farið hefur verið eftir hingað til.

Atvinnuvegir: Hönnuð atburðarás??

Nú rís hver topphatturinn upp af öðrum og jarmar um útflutning atvinnuveganna.  Öll fyrirtæki verði flutt úr landi eftir smátíma.  Gjaldeyrisumhverfið er ómögulegt,  fjármálageirinn er ómögulegur, skattarnir of háir.  Allt er undirbúningur.  Að leysa gjaldeyrishöftin úr viðjum stjórnmálanna.   Gera það með sprengingu og hvelli, Gengislækkun upp á nokkra tugi prósenta,  engin veðigjöld,lágir fyrirtækjaskattar.  Já, það verða allir glaðir, nema launamenn, öryrkja og ellilífeyrisþegar.  Hverjum er ekki sama um þá.   

Svo hittast valdamennirnir á barnum á 101, hlæja hátt, og reikna úr arðinn sem framundan er.  Já, það eru gósentímar í nánd.  Hver ætli fái svo Landsbankann á spottprís???  Já, lífið er ekki sem verst söng Svante.  Kannski fara fjárgreifarnir á Karokí stað og syngja Abba og Megas. Moní moní moní. Og spáðu í mig.   Auðvitað viljum við öll spá í þá í næstu kosningum. Þegar Hádegismóaliðið er búið að dæla, dæla í landslýðinn rugli.  Enginn kippist við þótt atkvæðagreiðslu um flugvöllinn sé stjórnað þaðan.  Ó nei.  Þeir eiga móana, landið og miðin, herrarnir þar. 

Já, lesendur góðir, Livet er ikke det værste man har, om lidt er kaffen klar. Ekkert Latte rusl fyrir mig. 

Æsing: Samræmd/könnunarpróf á villigötum?

Nú er fólk farið að æsa sig út í Samræmd próf aftur, þau eru bara svínafóður, er verið að ala svínin á einhverju vafasömu. Auðvitað ere það próf 10. bekkur sem rætt er um, eins og hann skipti enn öllu máli um inntöku í framhaldsskóla.  Enn eru gagnrýndar spurningar við ljóðum.  Spurningarnar eiga að vera svo innihaldsríkar fyrir nemendurna að hálfa væri nóg.  Það væri gaman að vita um hvað umrætt ljóð fjallaði að mati bloggritara.  

Það er sorglegt að kennari skuli ekki hafa orðið var við breytingar á stöðu samræmdra/könnunarprófa, þar sem þau eru haldin að hausti núna til þess að nemendur sem eru flestir orðnir 15 ára gamlir geti hugað að stöðu sinni þennan seinasta vetur í Grunnskóla.  Það er enginn felldur á þessum prófum, kennarar hafa líka tækifæri að fjalla um hina ýmsu þætti námskránna, sem erfitt er að fella inn í próf, 8-9 mánuði fram á vor, þar sem könnunarprófin  byggjast að mestu leyti upp á krossaspurningum.  Það eru ýmsir sem vilja fá gömlu, góðu samræmdu prófin, þeir skynja breytingar sem bloggskrifari virðist ekki átta sig á.  Samanborið landsfundur Sjálfstæðisflokksins:

 Í ályktun allsherjarnefndar- og menntamálanefndar landsfundar Sjálfstæðisflokksins er sömuleiðis lagt til að samræmd próf við lok grunnskóla verði tekin upp á ný, „til að framhaldsskólar geti metið nemendur á jafnréttisgrundvelli við ákvörðun um inntöku“.

Samræmd próf í 10. bekk voru lögð niður með nýjum grunnskólalögum sem tóku gildi árið 2008 en í stað þeirra tekin upp könnunarpróf að hausti, með svipuðu sniði og í 4. bekk og 7. bekk. Þess breyting hefur verið umdeild og halda sumir því fram að hún sé orsakavaldur n.k. einkunnaverðbólgu í grunnskólum þar sem kennarar vilja tryggja að nemendur þeirra komist inn í framhaldsskóla

Það eru líka könnunarpróf í 4. og 7. bekk sem sjaldan eru rædd, þar eru líka umdeilanleg atriði, enginn er fullkominn ekki einu sinni starfsmenn Námsmatsstofnunar.  En mér finnst að sú umræða, um þessi próf í  4., 7., og 10. bekk eigi að vera til þess að gera þau betri meðan þau eru við lýði.   Starfsmenn Námsmatsstofnunar eru ekki að semja próf af illgirni einni heldur eru þeir að reyna að semja þau með hliðsjón af Námskrám fyrir grunnskóla sem ráðherra og ráðnuneyti hafa skrifað undir, stundum í miklu samráði við kennara og samtök þeirra, stundum í litlu samráði, það fer hvers konar ríkisstjórn situr við völd. Farið er með spurningar út í skóla landsins og þau prófuð á stórum hópi af nemendum.  Útkoman þar er meira í samræmi við lokaniðurstöður sem nemendur fá í hendur en skoðanir nokkurra   kennara og sérfræðinga sem telja sig vera í heilögu stríði við yfirvöld og vita flest betur. Það er hægt að færa ágæt rök fyrir því að próf eigi ekki að vera í skólum.  En það hafa ekki foreldrar, kennarar eða yfirvöld fallist á og hafa önnur rök.  

Blogghöfundur segir : Matsaðferðirnar eiga bara, að mínu mati, að vera allt aðrar og mæla fjölbreyttari þætti.  

Matsaðferðirnar eru fjölbreyttar ef kennarinn og skólinn sem hann starfar við vilja, Það er skólinn sem sendir frá sér einkunnir nemenda í lok 10. bekkjar Grunnskóla og námskrár ætlast til fjölbreytni í mati. Samræmd próf hafa ekki það gildi sem blogghöfundur segir. Það er kennaranna og skólann að vinna námsmat úr hinum fjölmörgu þáttum allra greina skólakerfisins.  Sem betur fer eru gerðar kröfur um það víða.  

PS.   

Þessa efnisgrein skil ég ekki: 
Og það skyldi enginn halda að það sé nauðsynlegt að hanna prófið þannig að meirihluti þess sé ekki á valdi þriðjungs nemenda. Niðurbrot nemenda skrifast algjörlega á sparnað og gamaldags matsaðferðir. 

Páll á Húsafelli

Það er gaman að koma við hjá Páli listamanni á Húsafelli. 

Hann er galdramaður eins og Snorri! 

Sannir listamenn eru göldróttir!

Vetur á Sýrlandi

Ég hef aldrei komið til Sýrlands aldrei til Mið-Austurlanda.  Þar hefur ansi margt gerst seinustu árin.  Ágætir kunningjar mínir fóru fyrir nokkrum árum til Sýrlands með henni Jóhönnu Kristjóns.  Það var merkileg ferð sögðu þau.   

Nú eru ekki margir ferðamenn þar.  Landið hefur verið lagt í rústir einar.  Sem sér ekki fyrir endann á.  Nú hafa stórveldin samþykkt að ekki eigi að vera efnavopn þar.  Það má nota hvað sem er annað.  Mig skortir þekkingu að telja upp þau vopn sem þar eru notuð til að drepa fólkið í landinu og einn og einn sjálfboðaliða sem hefur tekið þá afstöðu að berjast með öðrum hvorum stríðsaðilanum.  

Það sem ég hef fengið að vita með því að reyna að fylgjast með gangi stríðsins er: 

á annað hundrað þúsund manns hafa verið drepnir
her landsins bombarderar landa sína með stórskotaliði og flugvélum
allir sem geta dæla vopnum í stríðsaðila 
stríðið hefur skapað gífurlegt flóttamannavandamál fyrir löndin í kring
verið er að leggja allar stoðir þessa samfélags í tætlur, afmá menningu, fornleifar, byggingar, vegi og borgir.
börn og ungmenn missa af menntun sinni og uppeldi 
allt snýst um stríðsrekstur 

Á meðan horfum við á, sameiginleg stofnun okkar Sameinuðu þjóðirnar er lömuð vegna átaka stór- og heimsvelda.  Svo á herinn að afhenda efnavopn sín, hvað sem á svo að gera við þau, það er erfitt að eyða efnavopnum.  En svo á að halda áfram að drepa, drepa og drepa.  En bara ekki með eiturvopnum.  Öllu öðru.   Þetta er sárara en orð geta tjáð.  

þetta getur leitt til átaka í fleiri löndum 
vanhæfir harðstjórar þar og annars staðar halda áfram að ríghalda í völd sín þetta lengir valdatíma þeirra
við höldum áfram að fá olíu frá þessum heimshluta 


Við getum með sanni sagt að það er Vetur á Sýrlandi ekki sumar. Orðið FRIÐUR er sjaldan notað.  Það er Vetur á Sýrlandi, vetur í hugsunum okkar.  

Fjölmiðlar helgarinnar: RÚV sigurvegarinn

Var að fletta fjölmiðlum helgarinnar sem ég hef aðgang að.  Það var ekki jákvæð reynsla.  Yfirgengileg yfirhelling auglýsinga og áróðurs, aðallega á svið heilsuiðnaðar og tísku.   Satt að segja hefur maður á tilfinningunni að það sé verið að kæfa mann í drasli.   

Fréttablaðið reynir að flagga einhverju um helgarnar, pistlahöfundarnir eru ekki fjölbreytt flóra, Steini Páls er stundum með forvitnilega pistla, er líklega fordómalausasti hægrimaður landsins.   En það vantar alla breidd í pistlana.  Sá eini sem mér finnst verulega skemmtilegur er Pavel, maður þarf ekki alltaf að vera sammála til að njóta hugleiftra hans.  

Eina fréttin bitastæð var um sölur Orkuveitu Reykjavíkur, þar kemur mér svo sem ekki á óvart hversu erfitt er að selja stór fyrirtæki og eignir,  fjármagn er erfitt að fá alls staðar,  þetta sagði seinasta ríkisstjórn landsmönnum en þeir trúðu þessu aldrei og urðu því auðvelt fórnarlamb óábyrgra stjórnmálaafla xB og xD.  

En minnumst á það sem er gott, það var einstaklega skemmtilegt viðtal við heimsfrægan íslenskan arkitekt sem ég hef aldrei heyrt minnst á, Jórunni Ragnarsdóttur, það var svona hlýlegt og náttúrulegt.  

Fréttatíminn virðist sérhæfa sig sem  kvennamiðill ég taldi 8 heilsíðuviðtöld og greinar þar sem 7 voru um konur og 1 um kall, ef ég man rétt.  Gunnar Smári er stundum með skemmtilega pistla.  En gagnrýnin blaðamennska?  Nei það var ekki mikið af henni.  Það verður vera meiri fjölbreytni svo ég fletti þessu blaði og lesi. Gunnar Hersveinn var með smápistil góðan  Annað var heilsa, mataræði, prjón og hekl, ennþá vantar helgarblað fyrir fólk sem vill fylgjast með fréttum, menningu, listum á gagnrýninn hátt. 

Það getur maður keypt á netinu frá útlöndum, svo hugurinn leitar æ meira þangað um helgar,  

En það er RÚV, sjónvarpið á sunnudagskvöldum sem ber af fjölmiðlunum um þessa helgi, í gærkvöldi var það skemmtilegt við Ragnhildar Steinunnar við Kára Helgason, doktorsnema í Ameríku, gaman líka að sjá gamalt kunningjafólk úr Borgarnesi, foreldra hans;    og þáttur Víkings Heiðars, Höllu Oddnýjar og Viðars Víkings um klassíska tónlist. Loks norska framhaldsmyndin Halvbroren, hún hefur gripið mig, og sjónvarpið er meira  að segja farið að auglýsa sérstaklega norræna þætti og myndir sem eitthvað sérstakt, það er nýtt.  Svona á dagskrá að vera, ég missti að vísu af myndinni um fyrri heimsstyrjöldina seinustu tvo sunnudaga eftir sögu Sebastians Faulks.  Svo er Broen II að koma ég bíð spenntur. 

Já lesendur góðir það haustar, stormurinn æðir um landið, það er eins og allt gerist fyrr núna, ég man þegar ég bjó í Borgarnesi þá tók maður upp kartöflurnar í byrjun október. En morgnarnir eru nú fallegir.  Þessir myndir eru teknar um sexleytið að morgni í seinustu viku.