Ögmundur heggur mann og annan

Ögmundur og umhverfisvinir brunuðu í Haukadal og komu að opnum dyrum.

Lítið fór fyrir hetjagangi gjaldtökusinna, engin sverð eða atgeirar á lofti.  Ég var í nágrenninu og klæjaði í beinunum en treysti mér ekki með börn þar sem ég bjóst við átökum.

Viðbrögð Haukdæla sýnir veikan grunn þeirra.  Þeir geta vaðið uppi í skjóli ráðherra sem ekkert gerir né getur. Það er enginn Gissur Þorvaldsson búsettur þar um slóðir nú.  Bara lögfræðingavinir og peysusalar. 

Svo Ögmundur vann léttan sigur og ég er ánægður með hann.  Sléttrakaður og glaðbeittur hélt hann tölu.  

Það er kominn tími að umhverfisfólk segi: Nú er komið nóg!!!!!!

Það var fallegt veður á Suðurlandi.  Ferðin var ekki alveg ævintýralaus, hjá mér ekki Ögmundi, en við lifðum það af, fjölskyldan, þótt að okkur væri sótt.  Í gærkvöldi var stjörnuskin og norðurljós úr heitum potti.  Grillað lambakjötið og franskt rauðvín smakkaði himneskt.  Svo eru Passíusálmar a la Megas framundan og Matteusarpassían, la vie est belle. 

Vonandi að Norðlendingar taki landareignir sínar til sín,  Dettifoss og Mývatn.   Linkind skilar engu !!! 

Ríkið hefur tækin; sagði Sigmundur Davíð

Það er ýmislegt látið flakka um lagafrumvörp ríkisstjórnarinnar um þessar mundir, en fáir minnast á það hvers vegna forsætisráðherra æði ekki í kröfuhafa eins og hann talaði um í kosningabaráttunni.  Hann tekur helminginn af þessu fé með skattheimtu sem gefur undir fótinn hugtakinu að fá með einni og borga með annarri.  Málið er að spurningin um kröfuhafa var alltaf blekking.  Ráðgjafar SDG hljóta að hafa vitað að það væri ómögulegt að ætla að koma fé frá þessum aðilum sem eiga þessa peninga, það eru margir Íslendingar sem eru kröfuhafar.  Svo það er almenningur sem borgar helminginn.  Það finnst mér röng aðferð, ég hef líka alltaf verið skeptískur á þessa almennu leið.  Þótt ég hafi verið þeirrar skoðunar að þeir sem hafa lent í stórhremmingum hefðu átt að fá leiðréttingu. það hefði átt að taka einn og einn og skoða og hafa ekki málið í höndum bankanna.  

Hér er útdráttur RÚV úr viðtalinu hér að neðan. SDG neitaði aldrei 300 milljörðunum þar, og fé kröfuhafa átti að renna til heimilanna, ekki almenn skattaleið!

Sigmundur Davíð Gunnlaugsson, formaður Framsóknarflokksins, segist geta ábyrgst að það fé sem ríkið fær í sinn hlut í samningum við kröfuhafa föllnu bankanna verði nýtt til að koma til móts við heimilin. Þetta sagði Sigmundur Davíð í þættinum Forystusætið, sem sýndur var á RÚV í kvöld.

Ríkið getur þrýst á um samninga
Ástæða þess að Framsóknarmenn treysta sér til að tala með svo skýrum hætti um það fjármagn sem þarna verði til er að svigrúm verður að myndast, annars verði ekki samið. Kröfuhafarnir vilja losna héðan út, segir Sigmundur Davíð, og ríkið hefur tækin sem þarf til að þrýsta enn frekar á um samninga, bætir hann við og vísar í skattlagningarvaldið og löggjafarvaldið. Ef ekki nást samningar fljótlega getur ríkið sett smátt og smátt meiri þrýsting á kröfuhafana, ekki bara þrýsting heldur gæti það líka gengið svo langt að setja gömlu bankana í þrot og þeir yrðu þá gerðir upp í samræmi við lög.

Sigmundur Davíð Gunnlaugsson, formaður Framsóknarflokksins, segist geta ábyrgst að það fé sem ríkið fær í sinn hlut í samningum við kröfuhafa föllnu bankanna verði nýtt til að koma til móts við heimilin. Þetta sagði Sigmundur Davíð í þættinum Forystusætið, sem sýndur var á RÚV í kvöld.

Ríkið getur þrýst á um samninga
Ástæða þess að Framsóknarmenn treysta sér til að tala með svo skýrum hætti um það fjármagn sem þarna verði til er að svigrúm verður að myndast, annars verði ekki samið. Kröfuhafarnir vilja losna héðan út, segir Sigmundur Davíð, og ríkið hefur tækin sem þarf til að þrýsta enn frekar á um samninga, bætir hann við og vísar í skattlagningarvaldið og löggjafarvaldið. Ef ekki nást samningar fljótlega getur ríkið sett smátt og smátt meiri þrýsting á kröfuhafana, ekki bara þrýsting heldur gæti það líka gengið svo langt að setja gömlu bankana í þrot og þeir yrðu þá gerðir upp í samræmi við lög.

Getur ekki nefnt neina dagsetningu
Spurður að því hvort einhver trygging væri fyrir því að 300 milljarðar kæmu í hlut ríkisins við þessa samninga sagði Sigmundur Davíð að ef niðurstaðan yrði ekki ásættanleg væri ekki hægt að ljúka samningum. Þá yrði ríkið að beita þeim tækjum sem það hefði til að ná ásættanlegri niðurstöðu. Hann sagðist ekki geta nefnt neina dagsetningu um það hvenær hægt væri að ljúka samningum af þessu tagi en áréttaði að ríkið hefði tækin til að knýja samninga fram.
Heimilin eiga réttmæta kröfu
Heimilin eiga réttmæta kröfu á þessi þrotabú, sagði Sigmundur Davíð, því leiðrétta þyrfti forsendubrestinn. Bankarnir bjuggu til þær aðstæður sem leiddu til forsendubrestsins, verðfall krónunnar leiddi til þess að skuldir heimilanna hækkuðu með ófyrirséðum hætti umfram réttmætar væntingar, sagði Sigmundur Davíð.
Ekki farið í flata niðurfærslu
Ekki verður þó farið í flata niðurfærslu höfuðstóls eins og Framsóknarmenn lögðu til árið 2009. „Viðmiðunin hlýtur að vera forsendurbresturinn og þar hlýtur að verða að miða við annars vegar eðlilegar væntingar um verðbólgu, til dæmis verðbólgumarkmið Seðlabankans og svo hve mikið umfram það verðbólgan varð“, bætir Sigmundur Davíð við. „Sá sem tók lán í síðasta mánuði getur ekki vænst þess að fá jafn mikla leiðréttingu og þeir sem tóku lán 2006". "Við verðum nánast að líta á þetta eins og myntkörfulán sem voru dæmd ólögmæt, þar sem menn hafa þurft að rekja sig aftur til að finna niðurstöðu, við verðum að líta svo á að forsendubresturinn hafi verið ólögmætur“.
Gagnast öllum ef heimilin rétt úr kútnum
Spurður um það hvort færa ætti niður skuldir þeirra sem ekki væru í vandræðum með afborganir sagði Sigmundur Davíð að það myndi gagnast samfélaginu öllu ef íslensk heimili rétta úr kútnum. Þetta snúist líka um stöðu þeirra sem ekkert hafi verið gert fyrir til þessa.
Því fleiri atkvæði því sterkari samningsstaða
Sigmundur Davíð var spurður um orð margra Sjálfstæðismanna sem hafa sagt undanfarið að atkvæði greitt Framsóknarflokknum sé ávísun á vinstri stjórn.  „Atkvæði greitt Framsókn er fyrst og fremst atkvæði greitt þeirri stefnu sem við boðum. Því fleiri atkvæði sem við fáum því sterkari samningsstöðu fáum við til að ná því fram“. En getur Framsóknarflokkurinn hugsað sér ríkisstjórnarsamstarf með Sjálfstæðisflokki að loknum kosningum? „Við getum starfað með þeim flokkum sem átta sig á mikilvægi þeirrar forgangsröðunar sem við höfum talað fyrir“.

Kjósendur eru í þeirra augum fífl........

Öðru hverju verður maður að hvíla sig á ráðherrum og þingmönnum. 

Annars yrði maður búinn að vera. 

Fyrirlitningin gagnvart almenningi er einstök.   Hvort sem talar Gunnar Bragi eða Birgir Ármanns, Ragnheiður Elín eða Illugi Gunnars. Kjósendur eru í þeirra augum fífl........ 

Ég slökkti á Kastljósi í kvöld. Þið vitið af hverju. 

Svo mættu þeir sjóðheitir formennirnir í dag og verða ennþá heitari á morgun. 

Höfuðstólarnir sem á að borga með skattpeningi. Ráðherrastólarnir sem gliðna í sundur.  

Enn er verkfall og þau verða fleiri.  

Grunnhugmyndirnar um lífið  eru oft svo merkilegar, hjá þeim öllum.  

Heimssýnin svo grunn, þekking á nágrannalöndum okkur ótrúlega götótt. Sýndarveruleikinn allsráðandi. 

Svo hvíld er góð.  Svo góð. 

Gunnar Bragi: Next stop Kiev

Gunnar Bragi reynir að verða nýr Jón Baldvin:  Stekkur upp í næstu vél birtist á byltingartorginu í Kiev. Klyfjaður íslensku 
lambakjöti og íslensku (eða er það írskt) smjöri.  Spurning er hvort lýðurinn fagni. 

Framsóknarráðamenn reyna að skera fæðingarstrenginn við Forsetann.  Hann er farinn að herða að hálsinum.  Gunnar Bragi tekur fyrstu sjálfstæðu ákvarðanir sem ekki vekja kjánahroll.  Pútín hjálpar þeim að uppgötva hversu hún er heimskuleg hugmyndafræðin sem byggir á að hlaupa upp í faðminn á einræðisherra.  Sáuð þið kosningakassana á Krím?  Gegnsætt plast !!!!! Ég sá ekki kjörklefana. 

Margir vilja losa sig við faðmlag við Forseta okkar, Birgir Ármannsson fyllist skelfingu þega hann nálgast.  Og Bjarni Ben vill frekar faðma aðra.  

Bjarni ræddi við David Cameron

Þar eru á ferðinni harðorð mótmæli  gegn Pútín.  En er nokkuð annað að gerast?  En mótmæli?  ÖSE samþykkir að senda eftirlitsfulltrúa til Úkraínu, en sættir sig við að engir fulltrúar séu sendir til Krímskaga!!!! Sýnir þetta ekki einu sinni enn máttleysi Vesturlanda gegn Pútín?   Hvar er líklegast að minnihlutahópar séu ofsóttir en á Krím???  

Og Gunnar Bragi, blessaður sé utanríkisráðherrann okkar, vonandi að ferð hans til Kiev skili jákvæðu hjartalagi landsmanna á hans eigin landi til hans og stjórnarinnar.  Hann má ekki við meiri bömmer. Ef hann vantar ráðgjafa þá er ég til !!!!  

 

Hornstrandaljóð: tileinkuð minningu Guðmundar Hallvarðssonar

Það er erfitt að missa vin til áratuga, það er enn erfiðara fyrir þau sem eru næst honum í fjölskyldu.  Maður er alltaf svo bjartsýnn að maður býst ekki við því að jafnaldri manns hverfi yfir móðuna miklu.  Foreldrar hans höfðu dáið ekki fyrir svo löngu og maður ætlast til þess að eiga allmörg ár eftir að mörkin eru tekin yfir í

löglega elli.  En svona er lífið, það er ekkert gefið, húsbóndi alls er harður og óútreiknanlegur, við sem höfum lifað saman, séð börnin alast upp saman, etið saman, gengið saman á fjöllum, hlaupið saman um götur Reykjvíkur, kvatt árið saman, við gerum ekkert meira saman. Það væri hægt að segja margt um þennan furðugrip sem Guðmundur var.  En ég læt mér nægja að láta nokkur Hornstrandaljóð sem tengjast ferðum okkur og upplifunum.  Eg vil einnig senda samúðarkveðju til allra hans nánustu. Lífið verður ekki eins, lífið er ekki alltaf réttlátt. Blessuð sé minning Guðmundar Jóns Hallvarðssonar.


Logarnir 

Logarnir í kestinum að sofna
sólin horfin og gnúpurinn er skuggi
maðurinn með kúrekahattinn
gengur upp að húsinu þar sem
söngurinn mun hljóma innan skamms
pallurinn fyllist af misfölskum söngfuglum

söngtrúðum logarnir
maðurinn með kúrekahattinn
í villta norðrinu þrammar uppeftir
í gljúpum sandinum með brimið að baki
kríurnar verja svæði sitt æstar reiðar
logarnir og söngurinn mun hljóma fram
eftir nóttinni og maðurinn með hattinn
mun detta út af falla í draumafljót með
hrotubrim í raddhafinu
logarnir slokkna deyja og árniðurinn
einn mun ríkja

Hælavík 

Eldavélin í gróðurhafinu
hvönnin safnar flugum og fjaran reka
þú ert fjarri en ég sé
sporin þín út að vatninu
þú sérð bátinn sigla inn víkina og
snýrð við

Fuglabreiðan þyrlast upp frá fletinum
er einhver hreyfing út við Ófæruna
goðviðrisskýin dansa yfir höfði þínu
þú greikkar sporin til að fagna gestum
þetta er síðsumardagi sólin glitrar á víkinni
og áin hvíslar að þér kynjasögum
en þú skeytir því engu
þú vilt fagn a gestum
þú veist að enn er aðeins að vænta
góðra gesta

Enn

Bjargbrúnin 

Þegar hann stóð á bjargbrúninni
eftir göngu erfiða upp Kambinn

niður hlíðina yfir mýrargróðri
skrýdda  víkina upp bjargið
fékk hann löngun til að
fleygja sér fram af fljúga
svífa niður horfa á fuglalíf fuglaheim
kynnast högum íbúanna vekja furðu
finna þyt loftsins svífa niður
að fletinum kljúfa hann kafa
mynnast við fisk sel og hval
hverfa koma aldrei upp aftur
finna nýjan heim svo fjarri öllu hér

Hverfa týnast

Júlíkvöld á Hesteyri

Kirkjan flutt í aðra sveit
leiðin ein síns liðs í garðinum
tófan bíður þögul leifanna
tómt hús tregar einsemdina
árniðurinn á seinasta orðið

Jarðnuminn 

brúnn safinn spýttist úr úr vitunum
hann samhverfðist jörðinni
hvarf inn í bjargið
moldarbrúnn safinn rann niður leggina
hann tók sér rótfestu í mýrinni
beið haustsins einverunnar
brúnn safinn rann úr augntóftunum
hann samsamaði sig jörðinni
hvarf mannabygg

horfinn týndur ummyndaður
klettaþurs þarakóngur stráfrík
einbúi


Þar sem fuglarnar ráða ríkjum 

Þar sem fuglarnir ráða ríkjum
hann var þar
þar sem fuglarnir ráða ríkjum
hann kom þar
niður kambinn með raddir
þúsundanna í eyrum
þar sem fuglarnæir ráða ríkjum
hvítt dritið dansar í augum
hvönnin þekur sjónhimnurnar
gróðurinn teyfir sig inn í sjóntaugarnar
svo óendanlega svo mikilfenglega
þar sem fuglarnir ráða ríkjum
hann var þar
hann kom þar

Lokadagurinn 

Reykurinn af glæðunum
morgnr pokarnir skórnir nestið
enn er lagt af stað seinasti

áfanginn reykurinn sem líður
upp í loftið svo mjúkt svo þýtt
seinasti dagurinn jökullinn kastar
kuldagjólu niður heiðina árnar
hjartakaldar og stingandi reykurinn
röðin seiglast upp skarðið grjótrikið
steinaveldið um kvöldið mannaríki
mannalíf pizzur orlý túborg cóte de rhón
reykurinn af glæðunum glæðum
minninga glæðum trega gnúpurinn
tignarlegur heilagur brimið svo eilíft
óhagganlegt jökullinn svo beinhvítur

lokadagur   reykur glæður
lokadagur þau lokast

Forsetinn hneigir sig fyrir Pútín

Utanríkismál okkar eru þessi misseri í uppnámi.  Við höfum utanríkisráðherra sem ræður ekki við starf sitt. Og auðséð er að Forsetinn ræður þar meiru en ríkisstjórnin.  Þótt hann feti ekki sómu slóð og ráðherrann í yfirlysingum um Krím.  Þá er hann trúr hugmyndum sínum um aukna samvinnu við einræðisstórveldin.  

Og orðalag hans um aukna samvinnu við Norðurlöndin sem ég hef feitletrað hér að neðan sýna vel hvaðan hugmyndir ríkisstjórnarinnar koma þegar skilja á að fullu og öllu við ESB.  Spurningin er hins vegar hvort þjóðirnar sem búa nær Rússlandi séu tilbúnar að þegja þegar Pútín er búinn að varpa valdasprengju sinni inn í Evrópu, sem veldur líklega mestri ólgu frá því að Sovét leystist upp og Austur Evrópumenn gátu sjálfir tekið völd í sínum löndum í hendurnar. 

Pútín er svo klókur valdamaður að hann sér að hann á leik þegar nágrannaland hansÚkraína á í efnahagslegum og stjórnmálalegum erfiðleikum, svo bætist við upplausn risaveldisins í vestri undri veikri stjórn Obamas.   Þjóðirnar á Norðurhjara sjá auðvitað að þessi innrás Rússlands á Krímskaga þarf í sjálfu sér ekki að vera einstök. Því er spurningin hvort þær treysti sér í nána samvinnu við Pútín sem svífst einskis.  Er hann ekki byrjaður að undirbúa hernaðarvæðingu í norðrinu?   Svo linkindarleg stefna Forsetans er frá mínu sjónarhorni fáranleg, svo er líka spurningin hvað hann á að vera að skipta sér af stjórnmálum.  Í umboði hvers talar hann?  Ekki í mínu.  

Forsetinn vildi ekki ræða stöðuna á Krím

Á ráðstefnuninni í dag voru tíðindi undanfarinna daga á Krímskaga rædd en nokkrir embættismenn gagnrýndu harðlega aðgerðir rússneskra stjórnvalda. Í ræðu sinni sagði Ólafur Ragnar hins vegar að það væri óviðeigandi að nota ráðstefnuna sem vettvang til að fordæma eitt af norðurslóðaríkjunum.

Hann sagði að það þyrfti ekki að taka lengri tíma en eina klukkustund til að grafa undan samstarfinu á norðurslóðum. Mikið væri í húfi og menn þyrftu að vera varkárir áður en þeir fjölluðu um ágreining innan einstakra ríkja.

Forsetinn sagðist jafnframt vera reiðubúinn að ræða ástandið á Krímskaga á öðrum vettvangi, en ekki á þessari ráðstefnu.

Í þessu sambandi væri mikilvægt að varðveita norrænar áherslur um umhverfisvernd, félagsleg réttindi, lýðræðislegar umræður og þátttöku almannasamtaka sem og virðingu fyrir náttúrunni og menningu frumbyggja.

Forseti rakti ýmis dæmi um framlag Norðurlanda á síðustu árum og hvatti til enn nánari samvinnu Norðurlanda um málefni norðurslóða. Það væri í senn skylda okkar og nauðsyn, hinn nýi prófsteinn á gildi norrænnar samvinnu.

Einræður Illuga

Fyrir nokkrum mánuðum heyrði ég menntamálaráðherra tjá sig um framhaldsskólann og þróun hans, aðalatriðin í þeim skoðunum voru þessi: 

Námi í framhaldsskóla á Íslandi á að vera lokið á 3 árum

Við eigum að líta til nágrannaþjóða okkar þar sem þetta er gert

Framhaldsskólakennarar eiga að fá betri kjör en það gerist bara ef skólinn er styttur í 3 ár

Íslenskir nemendur standa sig ekki nógu vel í samanburði við aðrar þjóðir

Svo var hann í hádegisútvarpinu í dag og enn segir hann nákvæmlega það sama og fyrir 8-9 mánuðum síðar: 

„Við erum eina landið innan OECD þar sem að það tkeur 14 ár að undirbúa fólk að far í háskólanám. Öll önnur lönd hafa annaðhvort 12 eða 13 ár. En það sem meira er," sagði Illugi Gunnarsson menntamálaráðherra í Morgunútvarpinu á Rás 2 í morgun. „Við erum sennilega það land sem kemur einna verst út þegar horft er til þess hversu stór hluti nemendanna klárar nám á tilsettum tíma. Þaannig að að það er alveg augljóst að það er eitthvað að í okkar framhaldsskólakerfi. Og eitt af því sem er augljóst, er að það þarf að stytta framhaldsskólann til þess m.a. að draga úr brottfallinu."

Það sem er svo merkilegt er að nú er hann búinn að koma upp stífri kjaradeilu, sem hann hefði getað leyst á auðveldan hátt.  Það er hann, ráðherrann sem á að ráða, hans hugmyndir.  En það eru svo margir sem eru svo sammála honum, bara ef hann setur ekki allt í hnút. 

Tökum nokkrar  hugleiðingar mínar: 

Stór hópur nemenda getur og á að klára frhsk.nám á 3 árum.  Það þarf ekki að breyta kerfinu mikið til þess.  Sbr. hugmyndir Sölva Sveinssonar um nýtingu prófmánaða. 

Stór hópur nemenda getur ekki lokið námi á 3 árum, því er hið sveigjanlega kerfi hér á landi gott til þess að gera þeim það mögulegt. Við sem höfum kennt á þessu skólastigi vitum það.  

Nemendur á Norðurlöndum fá styrk fyrir helstu nauðsynjum á skólatíma, þess vegna er vinna á skólatíma eins ekki mikil þar.  Þó er hún töluverð. 

Íslendski skólinn er allt of stéttskiptur, það eru allt of margir sem eiga erfitt meða að stunda nám vegna fátækntar fjölskyldn þeirra. 

Nemendur á Norðurlöndum eyða oft 1-3 árum eftir stúdentspróf að bæta við nám sitt til að komast í Háskóladeild að eigin vali.    

Ef framhaldsskólinn eru eins dapur og ráðherra segir hér að ofan þá er það furðulegt hversu þessi hópur stendur sig vel í Háskólanámi hér og erlendis.  

Það þarf fjölbreyttar aðgerðir til þess að stytta skólatíma, minnka brottfall, skapa námsgleði. Það gerir maður ekki með þvingunarðgerðum. Það gerir maðurmeð samvinnu við alla aðila kerfisins, finnum aðgerðir sem gleðja. 

Því skora ég á ráðherrann að semja kjaralega við kennara, leiðrétta hlut þeirra á ákveðnum tíma, Stofna starfshóp með þátttöku allra aðila og breyta kerfinu til góðs, þar sem ánægja og sáttfýsi ríkir, tekið er tillit til allra nemenda .

Einræður skapa ekki sátt. 

Græðgisvæðing ferðamála: Bjartir tímar framundan

Nú er ferðamálaráðherra búin að missa allt úr höndunum í sambandi við gjaldtöku ferðamála. 

Nú verða allir eigendur, náttúruminja, fossa, fjalla, hvera komnir með baukinn ef einhver 
ferðamaður sést   á ferð, akandi, rútandi, hjólandi, gangandi jafnvel fljúgandi. 

Græðgisvæðingin sigrar allt og við sjáum ráðherrann á harðaspretti burtu með allt niðrum sig, fögur sjón að tarna. 

Ég hlakka til þegar ég verð aftur ferðafær og get byrjað að stunda skæruliðastarfsemi á svokallaðar "eignir" fjárgræðgisvæðara. Það eru spennandi tímar framundan, þegar hópar frjálsra Íslendinga og bandamenn þeirra erlendist ryðjast inna á falleg gæðasvæði og fá óblíðar móttökur varðsveita græðginnar.  

Já, það verður flest að sorgargrúti hjá þessari tvíhöfðastjórn.  Það eru bjartir tímar framundan, gullið glitrar í glirnum landans.  Svo er Grænlandsævintýri hið meira framundan. 

Framhaldsskólar: Amatörabragur ríkisstjórnar

Allir bíða núna, verður verkfall eða ekki. Hver ber ábyrgð?  Hver ætlar að kasta út fjármunum heimilanna í landinu.  Það eru fáir sem tala núna um heimilin í landinu? 

Hvað kostar að leigja og vera í fæði á Akureyri þegar maður er ættaður frá Melrakkasléttu eða Þingeyri? Hvað kostar að vera með 3 framhaldsskólanema á heimilinu?  

Það er dýrt að kasta burtu heilli önn.   

Í fyrramálið sofa stærðfræðikennari,  framhaldsskólanemi í Grundarfirði, menntaskólanemi í Garðabæ  út.  Ætli gerist eitthvað á næstu dögum?  Er vilji til að semja?    

Verkföll eru dýr, ætli enn einu sinni komi í ljós amatörabragur ríkisstjórnrinnar?   Auðvitað vonar maður ekki. En fordæmin eru svo mörg .................    

Makríll: Ég trúi okkur ekki, sagði skáldið

Makríllinn er mál málanna, fiskur fiskanna, efi efanna.

Eitthvað fishy við þetta makrílmál. Ég trúi okkur ekki.  skrifaði skáldið (Hallgrímur Helgason)

Þetta hefur verið hugsun okkar margra.  Þegar stjórnmálamenn úr flestum flokkum lýsa yfir skoðunum sínum á Alþingi eða í fjölmiðlum. Hvort sem þeir heita, Sigurður Ingi, Steingrímur Joð eða Össur Skarp. Eitthvað slorlegt við þetta. 

Auðvitað eru ESB, Norðmenn og Færeyingar ekki að sýna stjörnuleik þar sem heiðarleikinn ljómar af þeim, þarna er á ferð dæmigerð valda og klækjapólítík, en við höfum svo sem tekið þátt í slíku á þessum vettvangi.
Um leið brenndu okkar samningamenn af þegar þeir þrömmuðu þungum skrefum út af vellinum  og skildu hina eftir í samningahug.  Það var afleikur af hæstu gráðu. 

  Hvern hefði getað órað fyrir því, ég var í Sundhöllinni á Seyðisfirði fyrir nokkrum árum, þar var maður með mér í gufunni og við tókum tal,  þá var þetta sjómaður á makrílsveiðiskipi sem hafði verið að sigla inn fjörðinn rétt áður.  Ætli þetta hafi ekki verið fyrsta alvörumakrílsárið fyrir okkur?

En hvað getur svo þessi flærðarsenna kennt okkur?  Ekki virðast stjórnmálamennirnir okkar hafa lært nokkuð eftir ummælum sínum að dæma.  Við eigum að muna Færeyingum þetta í næstu samningum við þá!! 
Ættum við ekki frekar að muna það hvar við búum, við hverja við höfum samskipti, hverjir kaupa framleiðslu okkar.  Við erum ekki ómissandi á taflborðinu.  
Og umfram allt eigum við að stunda hófsemi og virðingu í samningum við aðra.  Ætli við myndum ekki þá vinna okkur inn punkta, ætli yrði ekki meira tekið mark á okkur?  

Eigum við að trúa því að þeir sem hafa hafa haft uppi óbilgirni  í umhverfismálum hér uppi á landi leggi svo mikið upp úr því að láta náttúruna njóta vafans í hafinu?  Einhvern veginn á ég erfitt með að trúa því, eitthvað annað býr undir.   

Svo lesendur góðir, verum heiðarleg og nærgætin, þá verða stjórnmálahaukar það líka,  þá náum við góðum samningum með tímanum.  Það verður tekið mark á okkur á alþjóðavettvangi:  Hvalveiðar okkar, Grænlandsævintýri LÍÚ, utanríkisstefna núverandi stjórnar , þróunarstefna okkar,  sýna okkur að við eigum langt í land með það.  Lítum í eigin barm og bætum okkur. Það er aldrei of seint. 

Ríkisstjórn: Spilling, fylgjur og fórnarlömb

Það er engin furða þótt þau vilji ekki tala við fjölmiðla .....Það er engin fyrirsagnaþurrð á Íslandi, svo er ein erlend svona með.  Vonandi erum við ekki að feta í þá átt.  Menn vikunnar eru

Stefán Thors, Þórólfur framsóknareigandi, forsætisráðherra, Hanna Birna ættvæna, N1 sem er í vandræðum með fjármuni sína og greiðir arð langt umfram hagnað. Konan sem borðaði fylgjuna og fórnarlambið í Seðlabankanum. Er það furða þótt Birgitta sé hissa: 

Því var lofað þegar við vorum með þingfund í þarsíðustu viku, þá var því lofað og forsenda fyrir því að það var hætt að tala um skýrsluna og hinu hleypt á dagskrá, að silfurskeiðabandalagið myndi setja sig í samband við stjórnarandstöðuna og það gerðist ekki. Heyrðum ekki neitt frá þeim. Þetta er bara svo furðulegt allt. Maður hefði haldið að fólk myndi leggja sig fram við að finna lausn því það er svo mikil ólga í samfélaginu og sýna einhverja pínulitla auðmýkt.





Ég tala ekki við DV

Íhugaði að hætta eftir 
að áminningin var ógilt

Kaupfélag kaupir jarðir
Stjórnarformaður Héraðsvatna segir byggingu virkjana í Skagafirði aðeins borga sig fyrir orkufrekan iðnað

Fór með rangt 
mál í Kastljósi
Sigmundur Davíð sagði styrkveitingar í samræmi við vinnubrögð fyrri stjórnar

Frænka ráðherra 
fékk stöðuna

Ekki á meðal þeirra sem lögregluskólinn mat hæfasta n Með minni reynslu en aðrir

N1 - Undarleg arðgreiðsla

Hef ekki séð eftir því að innbyrða fylgjuna mína í eitt einasta skipti

„Auðvitað er ég fórnarlamb í þessu“

Kim Jong-Un fékk hundrað prósent kosningu

„Mér fannst nú margt slæmt síðast en þetta toppar allt“

Heilsugæsla: Enn meiri niðurskurður, enn verri þjónusta.

Í seinustu viku heyrði ég frétt í RÚV um niðurskurð í heilsugæslu á Reykjavíkursvæðinu. Enn á að skera niður grunnþjónustu, fækka hjúkrunarfræðingum og síðdegisvöktum, ekki á að ráða í stöður sem losna.  Þeir sem hafa notað þessa þjónustu vita að það eru hjúkrunarfræðingarnir sem geta veit símaþjónustu og sparað oft með því heimsóknir til læknis. Og þeir sem hafa notað síðdegisþjónustuna vita að þar er alltaf

troðfullt allir tímar fylltir á svipstundu.  Því panta þarf tíma hjá lækni með margra daga eða vikna fyrirvara.   Svo á að skera meira niður.  Skera niður 150 milljónir.  Líklega á að búa til Heilsugæslu Djöfulsins eins og góður maður sagði einu sinni um eina heilsugæsluna á Reykjavíkursvæðinu sem hann var ekki ánægður með. 

Það er kaldhæðnislegt að ég bjó 15 ár úti á landi, þar var langtum betri þjónusta en í Reykjavík svona frá degis til dags.  En gallinn var þegar maður þurfti að leita til sérfræðinga eða leggjast inn á stofnanir.  Þá gat kostnaðurinn orðið ansi mikill.  Mér skilst að það sé ennþá verra í dag.  

Ég hélt að allt myndi loga í mótmælum, en það heyrðist ekki múkk, þangað til nú, Ögmundur Jónasson skrifar ágætan pistil hjá sér í morgun og vitnar í Opið bréf til heilbrigðisráðherra frá ungum lækni, Má Egilssyni í visir.is. Þar sem varað er við þessari þróun. 

Ég hef heyrt upp á síðkastið í kringum mig hversu þjónusta er að verða verri og verri. Endalausir biðlistar í aðgerðir og jafnvel listar að komast í hjartaaðgerðir upp á hundruð.  Ég hef beðið í fimm mánuði eftir að komast í  hnjáliðaaðgerð og ég virðist ekki eiga að komast fyrr en í haust, þá er komið næstum ár.  Þrátt fyrir að geta varla hreyft mig nú orðið.  Vinkona okkar þurfti að bíða í 9 mánuði þangað til hún komst í móðurlífsaðgerð þar sem hætta var á myndun krabbameins, allan tímann þurfti hún að sitja uppi með kvíðann og angistina hvað væri á ferðinni.  

Það er spurning hvenær yfirvöld ætla að hætta þessari stöðvun, nú hafa heyrst fréttir af nokkurra milljarða gróða af bönkum sem ríkið fær, það væri kannski hægt að láta renna nokkur hundruð milljón í viðbót í heilsukerfið. Ríkisstjórninni veitir ekki af smá vinsældum um þessar mundir. 

En eflaust eru einhver betri gæluverkefni að þeirra mati.  Og kannski ætlast þeir bara til þess að sjúklingar leiti til kuklara sem selja fólki í lífshættu og lífsangist  huldulyf þar skammturinn kosta nokkur hundruð þúsund krónur.  Ætli það heiti ekki hinn frjálsi heilbrigðismarkaður? 

Þetta var fréttin á RÚV. 

Fækka á hjúkrunarfræðingum um sjö og hálft stöðugildi og fækka á síðdegisvöktum á heilsugæslum höfuðborgarsvæðisins til að mæta kröfum um niðurskurð.

Heilsugæslu höfuðborgarsvæðisins er gert að skera niður um hundrað milljónir á fjárlögum í ár. Á síðasta ári jókst kostnaður vegna rannsókna um fimmtíu milljónir og þarf því samtals að skera niður um hundrað og fimmtíu milljónir. 

Framkvæmdastjórn heilsugæslu höfuðborgarsvæðisins hefur ákveðið hvernig skorið verður niður og var læknum heilsugæslunnar kynntar þær hugmyndir í gær. Samkvæmt minnisblaði frá framkvæmdastjórninni verður ráðningum frestað, ekki ráðið í lausar stöður og riturum fækkað um þrjá.

Þórarinn Ingólfsson, formaður félags heimilslækna, segir að það eigi að fækka hjúkrunarfræðingum um sjö og hálfa stöðu. „Það á að sameina síðdegisvaktir sem kemur niður á aðgengi sjúklinga og sameina yfirstjórn sem gerir auðvitað stjórnunina fjarlægari.“

Þórarinn segir að það sem heimilislæknar geri athugasemdir við sé að þetta komi niður á grunnþjónustu og á aðgenginu. „Okkur finnst auðvitað skjóta svolítið skökku við að á þeim tíma sem heilbrigðisráðherra boðar  að heilsugæslan verði sett í forgang, hún eigi að verða grunnurinn að heilbrigðiskerfinu þá skuli framkvæmdastjórnin ráðast í þetta á sama tíma.“ 

ð 

Stefán Thors: Engin spilling á Íslandi???????

Það er engin spilling á Íslandi :  Lesið þessa grein og hugleiðið í hvers konar þjóðfélagi við lifum. 
Ég er bjartsýnn maður að eðlisfari en guð minn góður hvers konar lið hefur fólk valið yfir okkur. 

Íhugaði að hætta eftir að áminningin var ógilt

Stefáni Thors boðið að hætta í umhverfisráðuneytinu. Fékk ekki skýringar á uppsögn.

Ingi Freyr Vilhjálmsson
ingi@dv.is

06:00 › 7. mars 2014

Dró áminninguna til baka Sigurður Ingi Jóhannsson dró til baka áminninguna sem Hrafnhildur Ásta fékk í óþökk Stefáns Thors.

„Hann tilkynnti mér að hann myndi gera það og gerði það svo. Ég var mjög ósáttur við það,“ segir Stefán Thors, fyrrverandi ráðuneytisstjóri í umhverfisráðuneytinu, aðspurður um ástæður þess að áminning sem hann veitti Hrafnhildi Ástu Þorvaldsdóttur skrifstofustjóra hafi verið dregin til baka af umhverfisráðherra, Sigurði Inga Jóhannssyni. „Ég hugsaði minn gang eftir þetta, hvort ég ætti að hætta og fara að gera eitthvað annað, en ég ákvað að halda áfram þarna.“ Áminningin sem Stefán Thors hafði veitt Hrafnhildi Ástu í starfi var vegna samstarfsörðugleika við annan starfsmann.

Hrafnhildur Ásta, sem er náfrænka Davíðs Oddssonar, var svo ráðin sem forstjóri Lánasjóðs íslenskra námsmanna í lok árs í fyrra. Illugi Gunnarsson, menntamálaráðherra og fyrrverandi aðstoðarmaður Davíðs, skipaði Hrafnhildi Ástu í starfið þrátt fyrir að stjórn Lánasjóðsins hefði metið annan umsækjanda hæfari. Hrafnhildur Ásta var einn af þremur umsækjendum sem stjórnin mat hæfasta. Lokaákvörðunin um hvern skyldi ráða var hins vegar hjá Illuga Gunnarssyni og fylgdi hann ekki mati stjórnarinnar.

Ljóst er að Hrafnhildur hefði ekki getað fengið starfið hjá LÍN með áminningu fyrir brot í starfi á bakinu. Í viðtali við DV í lok árs í fyrra sagði Illugi Gunnarsson að hann liti ekki svo á að Hrafnhildur Ásta hefði fengið áminningu í starfi þar sem áminningin var dregin til baka.

„Ég áminnti hana vegna samstarfsörðugleika“

Boðin sérverkefni

Stefán Thors lét af störfum í umhverfisráðuneytinu síðastliðinn föstudag eftir að Sigurður Ingi tilkynnti honum að heppilegast væri að hann hyrfi til annarra starfa á vegum hins opinbera. Að sögn Stefáns kallaði Sigurður Ingi hann á sinn fund eftir að hann kom nýverið aftur til landsins frá Japan og spurði hann hvort hann vildi stíga til hliðar sem ráðuneytisstjóri. „Hann spurði mig hvort ég vildi stíga til hliðar sem ráðuneytisstjóri og fara í sérverkefni. Ég hafnaði því. Ef það var hans vilji að ég myndi stíga til hliðar þá vildi ég frekar fara í námsleyfi því það var greinilega hans vilji að ég myndi hætta.“

Þegar Stefán er spurður hvaða skýringar Sigurður Ingi hafi gefið fyrir því að hann vildi að hann færi í sérverkefni segir hann að engar skýringar hafi verið gefnar sem sneru að honum sjálfum persónulega. „Ég spurði hann að þessu og hann gaf engar skýringar aðrar en að hann væri ekki sáttur við vinnubrögðin í ráðuneytinu. Hann sagði jafnframt að þetta væri ekki mér að kenna.“

Stefán segist því ekki vita af hverju hafi átt að setja hann í sérverkefni.

Rannsókn vinnusálfræðings

Þegar Stefán tók við störfum í ráðuneytinu í apríl í fyrra var hafin rannsókn á máli Hrafnhildar Ástu sem vinnusálfræðingur sá um og ræddi hann meðal annars við fjölmarga starfsmenn ráðuneytisins. Rannsóknin byggði á kvörtun frá starfsmanni samkvæmt heimildum DV. Hrafnhildi Ástu var boðið að hætta í ráðuneytinu eftir að niðurstaða lá fyrir í rannsókninni en hún þáði ekki það boð.

Stefán Thors segist ekki geta rætt um rannsóknina en að hann geti staðfest að hann áminnti Hrafnhildi Ástu í kjölfar hennar. „Það sem ég get staðfest er að já, ég áminnti hana vegna samstarfsörðugleika. Meira get ég ekki sagt.“ Stefán segir að áminningin hafi átt rétt á sér.

Í kjölfar áminningarinnar reyndi Hrafnhildur Ásta að fá hana dregna til baka. Við það naut hún aðstoðar Jóns Steinars Gunnlaugssonar, lögmanns og fyrrverandi hæstaréttardómara. Stefán tók hins vegar ekki gildar athugasemdir Jóns Steinars og Hrafnhildar Ástu. Þegar Stefán lét sér ekki segjast þá var leitað til Sigurðar Inga Jóhannssonar umhverfisráðherra sem dró áminninguna til baka. Ráðuneytisstjórinn var ósáttur við þá ákvörðun, líkt og áður segir.

Refsing?

Sjaldgæft er að áminningar sem veittar eru af ráðherra eða ráðuneytisstjóra séu dregnar til baka. Katrín Jakobsdóttir dró til baka áminningu sem tiltekinn skólameistari hafði fengið árið 2010 en sú ákvörðun byggði á úrskurði umboðsmanns Alþingis sem taldi að áminningin hefði ekki átt að rétt á sér. Í því tilfelli var afturköllunin því byggð á úrskurði eftirlitsaðila. Einnig er sjaldgæft að ráðuneytisstjórar láti af störfum með svo skömmum fyrirvara og á sambærilegum forsendum.

Þegar Stefán er spurður að því hvort hann telji að verið sé að refsa honum, og hvort sá möguleiki sé ekki fyrir hendi að fyrst hægt sé að fá áminningu í ráðuneyti afturkallaða þá sé einnig hægt að hafa áhrif á mannval í þessu sama ráðuneyti, segir hann: „Ég veit það ekki […] Þetta eru þín orð en það má alveg spyrja.“

Stefán fer nú í námsleyfi í eitt ár. Hann segist ekki íhuga að leita réttar síns í málinu. „Ég er ekki fæddur í gær þannig að ég lifi þetta alveg af.“

DV hafði samband við umhverfisráðuneytið til að spyrjast fyrir um ástæður starfsloka Stefáns Thors í ráðuneytinu. Í svari frá upplýsingafulltrúa ráðuneytisins, Bergþóru Njálu Guðmundsdóttur, kemur fram að Stefán hafi óskað eftir námsleyfi sem ráðherra hafi veitt honum: „Ástæðan er sú að Stefán óskaði eftir námsleyfi sem ráðherra veitti honum.“

Miðað við orð Stefáns sjálfs voru ástæður starfsloka hans hins vegar aðeins flóknari en svo.

Tónlist: Sinfonía, Tench, Cash og Old and in the Way.

Gamlar lummur hljóma vel, glæsilegir tónleikar í kvöld, Mendelson, Tjækvoský og Kentis. Fullt af fólki, fólkinu leiðist ekki að streyma í Hörpu.  Eitt af fallegust tónlistarhúsum heimsins segja útlendingar, en það er ekkert að marka þá!   Japanska stirnið Midori var glæsileg svo mild og blíð
 í fiðlukonsert Mendelsons svo spilaði hún Bach sem aukalag fyrir glaða og æsta áhorfendur. 4.
 sinfonía hins tilfinningaríka Rússa var mögnuð, hljómsveitin upp á sitt besta, lúðrar og horn á efsta stigi.   Oliver Kentis var líka skemmtilegur, flott litbrigði og æsingur, ný lumma ansi góð.  Svo allir fór glaðir heim.  Það voru engir ráðherrar, held ég, á staðnum svo Sinfonía fær ekki gefins 5 milljónir!!!  

Ég er alæta á músík svo ég er núna að hlusta á margt: Benmont Tench hljómborðsleikarinn hjá hefur gefið út fyrstu sólóplötu sína á gamals aldri,You should be so lucky,  hann er þekktur sem meðspilari Tom Petty og nýi diskurinn er stórfínn mörg ný lög frá honum ásamt nokkrum klassíkerum frá Dylan; Corinna,Corrina; Duquesne Whistle. Hljóðfæraleikurinn frábær, Don Was, Tom Petty, Gilian Welch, David Rawlings, Ethan Johns (sonur Glyn Johns, stórframleiðandans) Jeremy Stacey og meira að segja Ringo Starr í einu lagi!  Góð plata fyrir gamlingja, ljúf og lagræn með frábærri spilamennsku. 

Annar diskur sem ég spila mikið er Rosanne Cash (dóttir Johns Cash)  The River and the Thread, ótrúlega mjúkur og ljúfur og djúpur, sannkallað meistaraverk, hún semur allt með John Leventahl manni sínum.   

 Sá þriðju er með blúegrass sveitinni Old and in the Way, diskur með tónleikum frá 1973, aldrei áður gefið út, Live at the Boarding House, það eru engir smámeistarar á þessum disk, Jerry 
Garcia, Pete Rowan, Vassar Clements, David Grisman,  og John Kahn.  allir meistarar á sín hljóðfæri. Spilamennska frá himnum.  

Það er gaman að kunna að njóta tónlistar, það er líka gaman að hafa fjölbreytni.  Það eru líka 2 jazzdiskar sem rata á spilarann núna Kind of Blue með Miles David og Like Minds  með nokkrum meisturum, Burton, Corea, Metheny, Haynes og Holland.   

Svona er lífið í Álfheimunum.  Góðar stundir !!

!

Engin fréttaþurrð: Ráðherrar, Höfðaborg, Úkraína og snjór.

Það er ýmislegt fréttnæmt þessa vikuna. Ráðherrar okkar standa sig vel, halda þjóðinni í spennu og blús !!!! 
Vinir mínir á Fésinu í áfalli.  Við þurfum ekki að óttast fréttaþurrð. 

Merkileg frásögn í Kiljunni af lífinu í Höfðaborg og Laugarnesskóla. 

Ég vann eitt sinn sem unglingur með manni sem bjóð með fjölskyldu sinni í Höfðaborg,  sem lofaði mér dóttur sinni í gjaforð.  Ég gleymdi svo að heimta kvonfangið.  Ætli það sé ekki sorgarsaga lífs míns?  Þetta er alveg satt. 

En að öllu gamni slepptu, þá var merkilegt að sjá konuna segja frá lífi sínu, lífð var oft ansi hart og miskunnarlaust í þá daga. Ég kynntist því líka í Bústaðahverfinu. Það er merkilegt með þessi tabú sem dregin eru fram á þessari öld, sem lágu í þagnargildi þótt ótal margir vissu um óhæfu, vonsku og gírugheit mannskepnunnar. Það var margt gruggugt undir sléttu og felldu yfirborðinu. Góðborgararnir lifðu góðborgaralífi of samtryggingin var algjör.  

Í Úkraínu skelfur allt og titrar.  Eins og oft áður er Sannleikurinn oftast  fyrsta fórnarlamb stríðs og átaka.  Það er sorglegt að sjá netvini mína tapa sér í óígrunduðum skoðunum áður en þeir hafa kynnt sér málin.  Eins og  að hinn afsetti forseti hafi átt að ríkja áfram af því hann var kosinn.  Og gleyma spillingunni, nepótismanum, stuldunum úr ríkiskassanum, einræðinu og harneskjunni til að halda völdum.  

Já, lesendur góðir það er engin fréttaþurrð þessa vikuna, svo er farið að snjóa í Reykjavík, við horfum á hvíta veröld, vonandi fáum við ekki aftur klakabrynju eins og legið hefur yfir öllu í vetur. 

Ráðherrar: málleysingjar og mannleysur

Maður er orðinn þreyttur á þessum fátæklegu íslenskumönnum sem húka
á valdastólum mállausir og mærðarfullir, snúa tungunni í ótal hringi.

Ómöguleiki framfylgjanlegur og svo framvegis. Ég minnist ekki á Vigdísi H.  

Svo eru vandræðin endalausu, að gefa loforð og ætla að svíkja þau, þeir sem gera slíkt eru mannleysur. 

Þeir vildu fá þjóðaratkvæðagreiðslu þegar þeim hentaði en nú hentar það þeim ekki. Forsetinn á að leiða þá úr gildrunni. 

En auðvitað blasir við eina leiðin, 50.000 manns vilja þjóðaratkvæðagreiðslu.  Því á hún að fara fram. 

Ef meirihluti þjóðarinnar vill áframhaldandi viðræður þá er að sjálfsögðu auðséð hvað á að gerast. 

Efna á til nýrra kosninga.  Þá kemur í ljós hvað þjóðin vill, krystaltært og skýrt. 

Heimsósómapistill á 67 ára afmælisdegi mínum

það er skrítið að lifa tíma sem gætu leitt til gjöreyðingarstríðs en enginn talar um það í alvöru

enn eru það stríðsherrar sem pungfrekjast og senda tindáta sína af stað á meðan aðrir stríðsherrar hneykslast á því eins og þeir hafi aldrei sjálfir gert slíkt 

allt út af skaga í Svartahafinu þar sem íslenskir stjórnmálamenn fóru í heilsu og sjúkraleyfi í boði 
sovéskrar alþýðu fyrir nokkrum áratugum 

við lifum furðulega tíma Pútín sem mér finnst ansi ógeðfelldur maður telur sig geta gelt og geðvonskast á kostnað nágranna sinna (líklega með stuðningi Kínverja sem vilja líka geta gelt í (Ó)friði á nágranna sína) 

Við boðberar friðar eigum ekki sæla daga SÞ sem áttu að vera talsmenn slíkra hugmynda verða aldrei nema handbendi stórvelda, við þurfum ekki annað en að hugsa til Sýrlands sem eru rústir einar í dag meðan heimurinn hefur allutr fylgst með sjónarspilinu 

svo ég hugsa bara um eigin sársauka í hnjám og baki á afmælisdaginn minn þegar ég er tekinn í tölu aldraðra

nú er ég búinn að bíða í 5 mánuði eftir að komast í hnjáliðaaðgerð og þarf líklega að bíða í 5 mánuði í viðbót 

þannig virkar heilbrigðiskerfi í velferðarríkinu Íslandi

smám saman minnkar hreyfigeta mína sterk verkjalyf gera ekki gagn, allir vinir og kunningjar spyrja um heilsuna og ég reyni að svara kurteislega, ég veit það eru margir sem hafa það verra en ég en einhvernveginn hugsar maður mest um sjálfan sig þegar maður skakklappast um íbúðina og einstaka sinnum í bæ eða út í búð 

á meðan valdamenn brugga göróttar eiturblöndur sem þeir hafa ekki hugmynd um hvaða áhrif þær geta haft á jörðina og enn eina ferðina er fólkið sem lifir á þessari jörð fórnarlömb lygamarða og svikapunga

og við, ræflarnir, bíðum og sjáum hvað setur, við getum lítið annað gert, stiginn hjá mér upp á þriðju hæð verður alltaf erfiðari og það tekur á taugar að hlusta á valdamenn þessa lands 

Þetta er heimsósómapistill minn á 67. afmælisdaginn

Austurvöllur: Þjóðhátíðarstemmning í bænum

Það var þjóðhátíðarstemmning í miðbænum í gær. 

Veðrið var svo gott, sólin blindaði, og þjóðin hafði lagt leið sína í bæinn til að lýsa því yfir að það væri hún sem hefði endanlegt ákvarðanavald. 

Sem ýmsir stjórnmálamenn gleyma um  leið og þeir eru komnir til valda. 

Kannski sátu þeir inn á einhverjum hástéttarbörum og horfðu óttslegnir út á milli rimlagardína. Ég veit það ekki. 

Stjórnmálamenn sem dettur í hug að þeir geti lofað svona til vonar og vara ef þeir lenda í samingaviðræðum við ákveðna flokka, þeir skilja ekki eðli og innihald lýðræðis.  

Þess vegna er nauðsynlegt fyrir fólkið til að láta vita af sér. 

Það var gert í gær á Austurvelli.  Það var bjart yfir öllum og allir sögðu: Hér er ég. 

Heilsuðu upp á vini og kunningja.  Kaffihúsið urðu yfirfull eftir fundinn.  

Svo er að sjá hvað gerist.  Maður býst ekki við miklu af þessum herrum.  

Það er ekki víst að við séu að upplifa vor, vor þjóðarinnar.

En í gær var þjóðhátíðarstemmning í bænum!!

Kjarni málsins: Það á ekki að ljúga að fólki

Stundum eigum við Íslendingar erfitt með finna kjarna málsins. 

Var að hlusta á mektarfólk ræða málin á RÚV 1, það komur þar margir punktar til umhugsunar. Í upphafi þáttarins leyfði Hallgrímur Thorsetinsson okkur að heyra öll fræg og alræmd ummæli vikunnar. 

En mér þótti vanta það sem valdið hefur ólgu almennings sem sýnir sig vel í skoðanakönnunum vikunnar.  Vinsældamissir stjórnarflokkanna, mikill meirihluti við umræður við ESB. 

Hvað er það sem hámenntaðir sérfræðingar og pönkari minntust ekki á.  Sem hefur vantað svo í stjórnmálaumræðu á Íslandi??? Það er sá einfaldi sannleikur að stjórnmálamenn eiga ekki að ljúga. Við eigum að krefjast þess að við upplifum ekki svona viku aftur. OG þeir sem eru staðnir að lygum, eiga að segja af sér. 

Siðvæðingar er þörf.  Í nágrannalöndum er slíkt í heiðri haft.  Maður sem staðinn er að lygur og falsi hann segir af sér.  Það er engin undankoma.  

Þetta eigum við svo erfitt með.  Við Íslendingar.  Að hafa skýrar og tærar reglur.   Þess vegna segi ég:  Siðvæðingar er þörf.  Þetta er það sem liggur undir í ólgu landans seinustu vikuna. 

Stjórnmálamenn eiga ekki, mega ekki ljúga.  Þá eru þeir búnir að fyrirgera rétti sínum að vera fulltrúar okkar í fulltrúalýðræði þjóðarinnar.